Thursday, January 31, 2008

مداح نفسه يبيله....؟

عبد الواحد العوضي قبل لا يكون وزير الاسكان اهوا نائب بمجلس الأمة وبالتالي توزيره كان بالأساس وعلى الأقل بهالوقت لأنه عضو بالمجلس
وبالتالي لما يطلع ويصرح ويقول : أقولها بالفم المليان مجلس الأمة متعاون
نرد ونقوله العنوان اللي كتبته فوق...ونقوله بعد
القرد بعين أمه غزال...ونزيد عليهم
ان ما يمدح السوق الا من ربح فيه
الا اذا كان قصده ان المجلس متعاون لهدم الدستور وكسر القانون وتخريب دولة المؤسسات فهذا شي ثاني ويمكن يصير حجيه صح
بعدين شنو قصة الفم المليان ...هذا مو حجينا
بس الظاهر العوضي وايد تأثر بأغنية موزة بنت خميس مليان قلبي مليان

Wednesday, January 30, 2008

حلم...واقعي

البارحة وآنا ماخذلي غفوة جريب المغرب حلمت وآنا جني بين أهل قريش واهما قاعدين يعبدون أصنامهم
قعدت أطالعهم وأسأل نفسي عن هالغباء اللي يخلي الانسان يصنع الصنم بايده بعدين يقعد يعبده ...لا ولما يوصل هالانسان لقمة الغباء يصنع الصنم من تمر ويعبده...وعقب فترة لما ييوع ياخذه وياكله...والمشكلة انهم يعتبرون هالشي قمة الذكاء...طبعا ما عجبني الوضع (ترى هذا كله بالحلم) رحت أحاجيهم وأنصحهم ان الشي اللي قاعدين يسوونه غلط...جان انطق طق السنة بساعة من أبو جهل وأبو لهب واهني صحيت من نومي وتعوذت من ابليس وحمدت ربي انه كان مجرد حلم
بعدين فكرت بأحوالنا بالديرة وشفت ان حالنا مو أحسن من أحوالهم مع ان احنا نقول ان احنا ما نوطي راسنا الا حق ربنا
جم واحد فينا يعبد الدينار؟
جم واحد فينا يعبد قبيلته؟
جم واحد فينا يعبد طائفته؟
وجم واحد فينا يعبد نفسه؟
وجم واحد فينا يعبد معزبه؟
وجم واحد فينا نسى ان الخير خير ربنا ثم ديرتنا

Tuesday, January 29, 2008

كفو والله..هذولا الناس اللي تفهم وتقدر

أكد البنك الدولي لديوان الخدمة ان عدم تشجيع العاملين في القطاع الخاص من خلال زيادة رواتبهم سيؤدي الى الفشل في حل مشكلة التوظيف
عاد صج والله هالأيام بديت أفكر بشكل جدي للانتقال للقطاع الحكومي بسبب عدم وجود فرق كبير بين رواتب القطاع الخاص والحكومي
والحكومة أريح وأضمن وظيفيا
عيل ليش أتعب نفسي اذا ما صار لنا تقدير من الدولة
علما ان عمري ماشتغلت بالحكومة وصارلي 12 سنة أكرف بالقطاع الخاص
بس قلة التقدير من قبل الدولة تييب الاحباط

Monday, January 28, 2008

حتى الحكومة صارت تنكت

الحكومة تعلن اهتمامها بالتعليم وفي نفس الوقت تقوم بتخفيض ميزانية التربية والتعليم العالي
اشلون هالحجي مادري؟
يمكن خبراء ومستشارين الحكومة لقوا طريقة سحرية تخليهم يطورون التعليم مع تقليل الميزانية؟
ويمكن الحكومة تبي تنكت عشان الشعب يضحك على غبائها؟
دولتنا صغيرة وماهي قد الحروب ورحم الله امرئ عرف قدر نفسه
وبالتالي بدل الصرف اللي ماله والي على معدات عسكرية تنفخ كروش وكلاء السلاح المتنفذين ويكون مصيرها انها تصدي بالمخازن
فالأولى ان يتم تخفيض ميزانية وزارة الدفاع لمصلحة وزارة التربية والتعليم العالي
لأن الدول الصغيرة اللي مثلنا سلاحها الوحيد مواردها البشرية
والموارد البشرية ما تعلو الا بالتعليم
بس للأسف محد راح يفهم هالشي لا بالحكومة ولا بالمجلس خاصة اذا عرفنا ان أهم مؤهلات عضو المجلس اهيا القراءة والكتابة
واذا عرفنا ان بعض أعضاء الحكومة زين اذا اهما خلصوا الثانوية العامة
وللعلم ان سنغافورة بلد صغير وغني وكل جيرانه طمعانين فيه
لكن حكمة وحنكة حكامه خلتهم يحافظون عليه بالتعليم وفتح البلد للاستثمارات الخارجية اللي اربطت مصالح دول العالم باستقرار سنغافورة
بس منو يتعلم؟

Sunday, January 27, 2008

اشبقى فيه؟

اشبقى بتلفزيون الكويت بعد منع البرامج السياسية الحوارية؟
مسلسلات هابطة وقلنا طاف وما نشوفها
برامج جاهد واذبح وقلنا لا حول ولا قوة الا بالله وما نسمع اشيقولون
برامج تافهة وقلنا وقتها ندور الموجة حق قنوات أرقى وأحسن
بس حتى الشي الوحيد اللي كنا نهتم فيه بالتلفزيون يمنعونه
حرية الكلمة والتفكير والنقاش يقيدونها
عيل اشبقى من شي محترم ويستحق المشاهدة بالتلفزيون؟
أدري نقدر ندور القناة
أدري الفضائيات الزينة وايدة
بس بالنهاية التلفزيون يمثل دولة الكويت ويعز علينا انه يطلع بهالصورة ويعكس صورة خاطئة عن الدولة وان حتى برامج راقية ما تلقاها فيه بالوقت نفسه اللي نشوف قنوات كويتية خاصة ما صار لها عمر ولا خبرة التلفزيون الحكومي بس صوتها مسموع وكلمتها محترمة بين الفضائيات
وبهذي الحالة أحسن للحكومة ولنا تصك تلفزيونها الردي توفيرا لفلوسنا ولعدم تعكير مزاج المشاهد ولحفظ صورة الدولة بالخارج

Thursday, January 24, 2008

قمة بالاحترام

دخول مفتشات الشؤون لاحدى المدارس الأجنبية في منطقة سلوى والطلب من المدرسة غلق أبوابها ومن ثم المرور على الفصول للتفتيش عن هويات المدرسين الأجانب
هل هذي طريقة محترمة لمعاملة مربيي ومعلمي الأجيال القادمة؟
هل هذا احترامكم لمن نأتمنه على تربية أبنائنا وفلذات أكبادنا اللي اهما أعز ما نملك؟
وهل كان فيه داعي للتفتيش على هويات المدرسين في مدرسة محترمة؟
واذا كان فيه داعي ما لقيتوا أرقى من هالطريقة الغبية وأمام الطلبة وجن المدرس صاير متهم بجريمة؟
والا يمكن هذي طريقة فهم المفتشات الأمثل للحكمة القائلة
قف للمعلم وفه التبجيلا...كاد المعلم أن يكون رسولا

Wednesday, January 23, 2008

هل وصلنا لبداية عهد يديد

صحوة الحكومة وانتصارها للوزيرة الصبيح هل يبشر بفجر يديد لاسترجاع هيبة الحكومة؟
علو صوت التحالف الوطني الديمقراطي بمعركة الاستجواب هل يكون مؤشر لبروز نجم يديد على الساحة السياسية؟
هل يكون هناك تحالف وتعاون يديد ما بين الحكومة والتحالف الوطني يكون لمصلحة الكويت أولا ويقضي ثانيا على تحالفاتها السابقة مع أحزاب استغلال الدين واللي ردتنا قرون للخلف؟
هالشي اهوا اللي راح نكتشفه بالقادم من الأيام
ويا خبر اليوم بفلوس باجر أكيد بيكون ببلاش
ومن هني لي باجر انتوا شنو تعتقدون بالنسبة للتساؤلات السابقة؟

Tuesday, January 22, 2008

ألف مبروك

ألف مبروك لج يا كويت
ألف مبروك لكم يا نساء الديرة
ألف مبروك لج يا نورية على تجديد الثقة فيج
أرادوا النيل من حقوق المرأة
أرادوا هدم أساس من أسس الديمقراطية
لكنهم ماقدروا...لكنهم فشلوا
لو الاستجواب كان مقصود منه الاصلاح جان قلنا حق من حقوقهم
بس اهما بغوا فيه كسر شوكة الدستور ونص المجتمع الآخر
لكن تدبيرهم رد عليهم بالخسارة
ومبروك كبيرة للحكومة اللي من زمان ما شفنا لها هيبة
ونتمنى ان صحوتها تكون دوم مو يوم

Monday, January 21, 2008

يا قلبي لا تبجي

النائب د.فيصل المسلم : ضرورة استصدار اذن قبل اقامة الحفلات الخاصة
زيييييييين
وبما انها حفلات خاصة...اشلون بتعرف يا حلو ان أكو حفلة أصلا...مو اهيا حفلة خاصة يعني يا محترم غير معلنة الا حق أشخاص معينين وبالتالي محد راح يدري فيها الا عاد اذا الحسبة ملوتكم بيفتشون كل بيت وشاليه ومخيم...وكل مطعم مصكوكة بيبانه عاد هذا شي ثاني...وعلى فكرة نبي اذن عشان ندش بيوتنا تدري يمكن فيه عورات نسائية ياية تزور الأهل وآنا لما أدش أشوفهم...ونبي هم قانون لكيفية لبس ملابسنا بدون مانشوف عوراتنا عشان ما نخدش حيائنا...ولا تنسى على الطريج نبي قانون حق وزارة الأشغال تبني طرق رجالية وطرق نسائية لمنع الاختلاط بالشارع...ونبي تحديد المجمعات النسائية والمجمعات الرجالية هم لمنع الاختلاط
وآنا أقول لك يا دكتور يا نائب يا محترم خلك من هالاقتراحات الانتخابية اللي لا تودي ولا تييب وعطنا اقتراحات سياسية واقتصادية وثقافية وتعليمية وتجارية ورياضية تفيد بتطور ونماء الديرة مع اني ماعتقد ان عندك مثل هالأفكار لأن مخك موجه ومبرمج حق تقييد حريات البشر وبس

Sunday, January 20, 2008

ولاية عامة..لا لا لا...ولاية خاصة

في اليومين السابقين تبارى شيوخ الدين بالفتاوي للحكم على موضوع طرح الثقة بالوزيرة الصبيح
واحد يقول ولاية عامة ويجب طرح الثقة فيها
والثاني يرد ويقول ولاية خاصة وطرح الثقة يجب أن يكون بناء على الاقتناع بخطأ الوزيرة من عدمه
واللي يقول ولاية خاصة ويتراجع ويقول ولاية عامة بس هالشي ما يغير من فحوى فتوتي
زين وبعدين
يا جماعة معظمنا مسلمين ونعرف ربنا بس بنفس الوقت كل واحد يطالع الدين من منظوره
واحد يشوفه من منظور ابن حنبل وابن تيمية
واحد يشوفه من منظور حسن البنا وسيد قطب
واحد يشوفه من منظور السيستاني والشيرازي
واخذ يا فتاوي واخذ يا حوسة
يا جماعة الدين يسر مو عسر...واختلاف الأمة خلوه رحمة مو نقمة
وعشان جذي تيي القوانين وتنظم عمل الدولة
عشان جذي لما تختلف آرائنا ونظراتنا نحتكم للقانون ودولة المؤسسات والدستور
احنا بدولة مدنية تحكمها قوانين وعلى هالأساس تمشي والاحتكام بكل صغيرة وكبيرة لشيوخ الدين راح يمزق ويفكك ويفرق الدولة والشعب
كفـــــــــــــــــــــــــــــــــــــــــــــــاية....ولا تكرهـــــــــــــــــــــــــــــــــــــــــــونا بشي اسمه الدين

Thursday, January 17, 2008

بين الأحياء والأموات

يا راشد الحمود...مو آنا اللي أرد على مقالتك التافهة عن تاريخ عبدالعزيز الصقر الله يرحمه
اللي يرد عليك انجازات هالانسان تجاه ديرته وشعبه
اللي يرد عليك نضال هالرجل لرفعة وطنه وناسه
بس ما حبيت الا أقولك
شنهي انجازاتك انت غير الحش والقيل والقال اللي تفتخر فيها ومثل ما يفتخر عبدالعزيز الصقر بانجازاته واللي نفتخر احنا فيها قبله واللي كان من أهمها دستور الكويت؟
بشنو راح تخلد اسمك عقب مماتك مثل ماخلد عبدالعزيز الصقر اسمه عقب وفاته؟
وأخيرا...فلو كان فيك ذرة شجاعة جان واجهته واهوا حي بحجيك التافه مو عقب وفاته
ويا راشد ترى الميت ما ينقال عليه الا الرحمة

Wednesday, January 16, 2008

خذ الحكمة من أفواه.....؟

النائب سعدون حماد : استمرار نورية الصبيح يعزز ولاية المرأة وسأصوت مع حجب الثقة عنها
الصبيح يا حماد ردت وأبدعت وأفحمت وأقنعت
والظاهر ان معزبك ما لقى الا هالسبب يعطيك اياه عشان تصرح فيه حق الجرايد
واذا كان هذا رايك وآنا ماعتقد لأن أشكالك وأمثالك يدارون بالريموت كنترول من راعي بطولات هجيج ومزاين الابل والمطيرجية فالأفضل لك انك تستقيل اذا ما تم طرح الثقة بالوزيرة حفاظا على مبادئك السامية مع اني هم أعتقد ان لا عندك لا مبادئ ولا هم يحزنون
وماقول الا
خذ الحكمة من أفواه...........؟ وعليكم التكملة

Tuesday, January 15, 2008

يحليله

وزير الاعلام صباح الخالد الصباح : تضافر جهود المؤسسات مهم لدعم المبدعين
عن أي دعم يتحجى؟
اهوا بقى مبدعين بالديرة؟
الكل حايشه احباط من الحكومة والمجلس والأخ يقول دعم الابداع
واحد من ثلاثة
اما ان الأخ قاعد ينكت...بس نكتته طلعت حدها بايخة
أو انه قاعد يتحجى عن شعب وحكومة ومجلس اليابان
أو انها زلة لسان واللي كان يقصده...تضافر جهود المؤسسات مهم لتطفيش المبدعين وهني أصدق حجيه

Monday, January 14, 2008

أمنية مدون...وملاحظة

صار لي 12 سنة ونص من تخرجت من الجامعة واشتغلت
وكل هذي المدة قضيتها بالقطاع الخاص لأن مجالاته أرحب وأوسع من الحكومة
علاوة على المستقبل الأفضل والمهارات الأحسن وحرية اتخاذ القرار فيه أسرع وأكبر
والأهم ان معاشاتهم أكثر أو خلنا نقول كانت أكثر
لأن مع الزيادات المتتالية لمعاشات القطاع الحكومي (الله يهنيهم) ومع راحة البال اللي يعيش فيها موظف هذا القطاع والشغل القليل بديت أحس بصراحة اني كنت أكبر غبي لأني صدقت نفسي ورحت حق القطاع الخاص اللي كله تعب وقلة راحة وساعاته أطول والحين صار معاشه بالنسبة للحكومة ما يسوى
فأمنيتي ان الحكومة الرشيدة أو المو رشيدة ترفع معاشاتنا احنا موظفي القطاع الخاص مثل ما ترفع معاشات قطاعاتها خاصة ان الغلاء صاير على الكل مو بس موظفي القطاع الحكومي واذا ما صار هالشي مالنا الا نتجه حق القطاع الحكومي
التوقيع : مدون مقرود بالقطاع الخاص
ملاحظة للديوان الأميري والحكومة
احنا اللي فينا مكفينا
والزحمة منا وفينا
زين ليش ما يتم الاستعانة بالطيران العمودي لتنقلات زوار الديرة من الرؤساء والضيوف الكبار وايد آمن لهم ويقلل الازدحام علينا؟

Wednesday, January 9, 2008

قيمة الانسان

بكل يوم...بكل ساعة...وبكل لحظة
أسأل نفسي عن شنو تكون قيمة الانسان العربي عند حكوماته؟
ألقى نفسي ترد وتقول
انت يا انسان يا عربي قيمتك وقيمة البهيمة مكرم السامع عند حكومتك واحد
هذا اذا ما كانت قيمة البهيمة أحسن وأفضل بمليون مرة
_______________________
شنو ويه الشبه بين
حدس
والحية الرقطة على قولة الوالدة؟
كلهم يتلونون على ماية اللي جدامهم
الاستجواب وخلص عيل اشقاعدين ينطرون عشان يحددون مواقفهم؟
يمكن يبون يسألون بوش لما يوصل وعقبها يحددون رايهم:p

Tuesday, January 8, 2008

ثلاثة خواطر

أولا
عشان ما يزعل علينا أخونا الحارث
نبارك ونهنئ الأمة الاسلامية والكويت والعالم أجمع بقدوم السنة الهجرية اليديدة
كل عام وانتو بخير ويا علها سنة حلوة على الكل
________________________
ثانيا
أخيرا بدينا نشوف ونلمس التحرك الواضح للتحالف الوطني على أرض الواقع
أخيرا صحوا من نومهم
أخيرا بدينا نلاقي صوت على الساحة السياسية يواجه ويوازن تواجد الجماعات والتيارات الاسلامية بشقيها السني والشيعي
نتمنى يالتحالف ان هالصحوة تكون دائمة...نتمنى انها تكون لصالح الديرة...نتمنى انها ما تكون مجرد ردة فعل
________________________
ثالثا
نشكر طلاب وطالبات الجامعات الخاصة على تحركهم الأخير لمواجهة اللي يبون القضاء على حريات البلد وتقييد الفكر
ونتمنى انهم ما يكتفون بهالشي فقط في حال تعرض أشباح وجواسيس الفكر المتحجر من بعض نواب الأمة لأشخاصهم وتم عرض الأفلام اللي تتعرض لحرياتهم اللي يكفلها الدستور بجلسة الاستجواب اليوم ورفع قضايا عليهم عشان يوقفونهم عند حدهم

Monday, January 7, 2008

فترة الامتحانات

هالأيام الامتحانات مسوية لوية بكل بيت
والأهم ان الامتحان العود اللي شاغل بيتنا الكبير الكويت اهوا امتحان الحكومة باجر...امتحان استجواب الوزيرة الصبيح
ندري ان الاستجواب شخصي...ومعادي للمرأة
بس منو المسؤول عن الدوامة اللي يعيش فيها البلد؟
منو المسؤول عن خراب مالطة عفوا أقصد الكويت؟
نرد ونقول الحكومة اهيا السبب بمشاكلنا ومتاعبنا
ولما نقول الحكومة فبالتأكيد أصابع الاتهام تتجه للأسرة...وهذي ضريبة قيادتها واحتكارها لرئاسة الحكومة من يوم اقرار الدستور
هذي ضريبة خلافات الأسرة اللي قاعدين ندفعها احنا وعيالنا
هذي ضريبة اللعب بالدستور والقانون ودولة المؤسسات من لحظة ولادتهم
نتمنى ان الحكومة تطوف الامتحان العسير...مو لأنها زينة لا وألف لا
بس لأن الاستجواب شخصي ولا يخدم الا قوى الفساد اللي قاعدة تحشد كل طاقاتها للاجهاز على الدستور
والدليل على هالشي ان الكل سكت عن تجاوزات ملف التجنيس وما سمعنا الا صرخة هني وهناك ومحد تحرك فعليا لاستجواب وزير الداخلية مو بس اعلاميا مثل ماسوى المليفي
ونتمنى للمرة الألف ان الحكومة تاخذ العبرة من اللي قاعد يصير وتعرف ان عدم دعم الدستور وارساء دولة المؤسسات وتطبيق القانون راح تكون نتائجه جاسية على الكل وأولهم الأسرة
نتمنى انها تقوم بدعم الناس العقلاء مثل ما قامت سنين وبنين بدعم مؤسسة الفساد
نتمنى انها تمشي فعليا بطريج الاصلاح ووحدة الديرة
نتمنى انها تبني حاضرنا عشان نستفيد من هالبناء بمستقبلنا
يصير هالشي والا ما يصير...مادري؟
بس ماقول الا
ان غدا لناظره لقريب
وفي الامتحان يكرم المرء أو يهان

Sunday, January 6, 2008

الحق عندما يراد به الباطل

الحق لما يراد فيه الباطل يصير مثل الورد الحلو بس المتروس شوك
والاستجواب مثل ماهو حق دستوري الا ان كثرة استخدامه والتهديد فيه باللي يسوى واللي مايسوى يحوله لأداة هدم وعرقلة لتنمية الديرة
ليما وصلنا لوقت صار الكل فيه يمشون تحت الساس وما يشتغلون خوفا من بعبع الاستجواب وصرنا مانعرف الاستجواب الصح من الخطأ
بل ان الاستجواب صار أداة للانتقام الشخصي من الوزراء
أرجع وأقول وأؤكد ان الاستجواب حق...بس بشرط عدم استخدامه للباطل وانه يكون للي يسوى مو للي ما يسوى
وهم أؤكد ان استخدامه بالطريقة اللي صايرة عندنا يكون اسلوب من أساليب المخطط اللي بدا من يوم اقرار هذا الدستور لهدمه والكفر فيه واشتركت في هذا المخطط عدة أطراف ولعدة أسباب
الأسرة تحس ان هذا الدستور مقيد لها وعشان جذي حاربت ومازالت تحارب الدستور مع انهم لو يفكرون جان لقوا ان هذا الدستور اهوا اللي يضمن ديمومة حكمهم
الاسلاميين حاربوه بسبب عدم ايمانهم فيه من الأساس واهما يبون اعادة تشكيله على أساس الشورى اللي ما يكون فيها الا فقهاء الدين لأن غيرهم رعاع وما يحق لهم المشاركة في الحكم
المتنفذين شافوا فيه كسر لطموحاتهم وتقييد لاحتكاراتهم وتضييق لنفوذهم
في النهاية ما راح ينقذ هالدستور الا تمسك الشعب فيه
ما راح يحافظ عليه الا شباب الديرة لأنه مستقبلهم وأملهم
ولما نقول الشباب فاحنا بالتأكيد نقصد بنات وأولاد البلد
ونتمنى ان تكون لهم كلمة وصوت عالي بالانتخابات الياية ترجع الهيبة للدستور والقانون ودولة المؤسسات

Friday, January 4, 2008

ما يبشر بالخير

أولا شكرا كبيرة جدا جدا جدا لكل من علق بموضوعي السابق وهنأني بالعام اليديد
ثانيا آسف لعدم الرد وذلك لأني كنت أصارع فيروس دش جسمي ولعب فيني لعب وتوني بديت أصحى منه
ثالثا
ان فوق المرض فالوضع بالديرة أبدا ما يبشر بالخير
الحكومة ماشية على نهج الحكومات السابقة واهوا العمل على هدم مواد الدستور والقانون ودولة المؤسسات
الاخوان يبون اقامة دولة الاسلام على نهج الاخونجية
السلف يبون يعيدون دولة الاسلام على نهج طالبان
الشيعة يبون اقامة دولة ولاية الفقيه
المنبر للحين قاعدين يتحجون باستراتيجيات الستينات وللحين ماستوعبوا ان القوميين العرب انتهوا
التحالف عندهم نظرة لانقاذ البلد ولكن دون تحرك جاد
المستقلين يبون يستغلون الديرة لآخر قطرة نفط
الاسلامية اليديدة يبون ديرة الاسلام على أساس التطرف القبلي
الشعبي مع الخيل يا شقرا وبوصلتهم ضايعة
والشباب اللي اهما أمل الديرة ساكتين ونايمين ومخلين القرعة ترعى
يا ترى هل راح تكون الكويت لبنان الثاني؟