Thursday, February 28, 2008

مخ طنق

بورمية في سياق رفضه لازالة التعديات على املاك الدولة : لماذا لا يواجه رئيس الوزراء تجاوزات ابن عمه والا حاميها حراميها
بذمتكم هذا منطق نائب امة والا منطق حرامي؟
مو المفروض انه يدعو لازالة كل اشكال التعديات من ابناء الاسرة والوزراء والنواب والشعب؟
مو المفروض انه يوقف ويتذكر الشرفاء بهالديرة اللي محترمين نفسهم ولا عندهم اي مخالفات لا بالشاليهات ولا بالشويخ الصناعية ولا بالدواوين مثل ما انه تذكر ودافع عن حرامية الديرة؟
يابورمية ليش ما تتحجى عن الناس اللي محافظين على ضمايرهم؟
يا محامي الحرامية والبواقين ليش ما تساند اللي رافضين كل اشكال النهب اللي قاعدة تصير بالبلد؟
يا بورمية الحجي اللي انت تقوله (ذاك باق ليش آنا ما ابوق) هذا منطق الغابة والحيوانات اللي يعيشون فيها من غير قانون
بس الحيوان معذور ما عنده مخ...ما يفكر
انت يا دكتور وين مخك؟....وين تفكيرك؟
بس الظاهر يعجبك منطق الحيوانات وعيشتهم

Wednesday, February 27, 2008

ردينا

عقب المسيرات بربوع بنيدر وميناء عبدالله
عقب البقي والبانشي والسياكل
عقب الفوم ورشاشات الماي اللي تبهذلنا فيها من الأباليس يهال الديرة اللي شاقين القاع وقايلين امباع
بس ميخالف احتفالات الديرة تستاهل
ويستاهل عيال الديرة وأهلها يستانسون بأعياد ديرتهم
عقب كل هذا ردينا لكم
والحمد لله بدون أي اصابات
تصدقون ماودي أدش بالسياسة من أول يوم بس عندي جم سؤال لكم
اشلون تتوقعون من نواب الأمة الدفاع عن الديرة وأموالها واهما قاعدين يقاومون ازالة التعديات على أملاك الدولة؟
واشلون تتوقعون الاصلاح ونواب الأمة قاعدين يحاربون معظم محاولات الاصلاح؟
والأهم...ما تتوقعون ان نواب الأمة الحاليين قاعدين يحاولون تكفير الناس بشي اسمه ديمقراطية؟

Thursday, February 21, 2008

عيدي يا بلادي

ألف مليون مبروك عليج يا كويت بعيدج الوطني
ألف مليون مبروك عليج يا أمي بعيد تحريرج
مبروك لكم يا أهل الديرة بأفراح الاستقلال والتحرير
ويعود الله علينا هالأيام وكويتنا وأهلها بخير وعافية
ملاحظة : تم اضافة اللنك للموضوع السابق مع اعتذاري عن نسيان وضعه من البداية...تدرون أخوكم عليمي بالكمبيوتر
وسامحوني اني أتغيب عنكم 5 أيام وأرجع لكم عقبها واللي يبي يشوفني يلقاني بمسيرات بنيدر

Tuesday, February 19, 2008

يأمرون الناس بالمعروف وينسون أنفسهم

محكمة الجنح المستأنفة تقضي بحبس داعية اسلامي كويتي معروف لمدة عام مع الشغل والنفاذ بعد قيامه باصدار وبسوء نية شيكا من دون رصيد بمبلغ 13 مليون دينار كويتي
بعد لو انسان عادي نقول لا حول ولا قوة
بس داعية اسلامي
لا وبعد معروف وبسوء نية يعني عن سبق اصرار وترصد
بس الظاهر الحبيب يشتغل بمبدأ : لا تحجى الشرع فالكل ياكل تبن مكرم السامع والقاري
وبما ان اهوا داعية ويطبق الشرع فالنهب حلال عليه

Monday, February 18, 2008

تحية من الأعماق

250
تحية لكل من ساهم لمقاومة المد الأصولي المتطرف
250
تحية لكل من واجه جمعية الافساد الاخواني
250
تحية لكل من تعنى يوم أمس وسجل قضية ضد ابتزاز حدس الحقير لأفراد المجتمع
250
تحية لكل من رفع رايات حرية الكلمة والاختيار أمام خفافيش الظلام
بدينا حملة الدفاع عن الدستور والقانون ودولة المؤسسات
وكل اللي أتمناه ان احنا نكمل وما نوقف
نعم للدستور والقانون ودولة المؤسسات
وألف مليون لأ لتقييد حرية الراي المسؤولة والكلمة الصادقة وحرية الاختيار الواعي
ألف مليون لأ لكل تيارات التأسلم المتطرف السنية والشيعية

Sunday, February 17, 2008

اكملت

خلصنا من الطبطبائي و تأييده حق شيخه وتاج راسه بن لادن
خلصنا من القطان ونباطته اللي كان بيساعد فيها حماس
واكملت السالفة مع السيد عدنان عبدالصمد وتأبينه حق المجرم مغنية
يا سبحان الله...ايتمع السلف والاخوان السنة مع حزب الله الشيعي على الشر فقط
زين آنا عندي سؤال
ليش ما يروح الطبطبائي ويجاهد مع بن لادن بأفغانستان؟
وليش القطان ما ياخذ نباطته ويروح يحرر فيها فلسطين؟
وليش ما يلحق السيد عدنان ربعه حزب الله ويروح لبنان يمكن يؤسسون لهم دولة ولاية الفقيه هناك؟
لأن احنا اهني بالكويت
وما تهمنا الا الكويت
وعزنا وفخرنا الكويت
وتاج راسنا الكويت
وما يهمنا لا سلف بن لادن ولا اخوان حماس ولا حزب نصر الله
اهني الكويت وبس

Thursday, February 14, 2008

Happy Valentine Day

Happy Valentine Day


للعالم أجمع


وللكويت بشكل خاص


وللزوجة العزيزة على القلب سدرة العشاق حلوة الأوراق بشكل أخص


وموتوا قهر يا لجنة الظواهر السلبية والنكد والغم


وموت قهر يا الطبطبائي والحربش وعكاش


وترى الفرحة بالقلب وعمركم ما راح تقدرون تمنعونها


علما بأن هالشي ماهو اعتقاد اهوا يوم عادي مثله مثل يوم العمال ويوم الأم...وندري ان كل أيام الله حب بس تخصيص يوم لتكريم هذا الحب ماهو عيب علما ان الحب يكون للزوجة والأهل ومو بس مثل ما يصوره أصحاب اللحى بأنه يوم للفسق والفجور وعظائم الأمور
ومو عيب ان احنا ناخذ أي شي من الغرب اذا كان صح مثل ما احنا ندز عيالنا لهم للدراسة مثلا
أما اعتبار كل شي منهم حرام فهذا اهوا الغلط بعينه وعلمه
وبالتالي فاحنا نتمنى من الطبطبائي وربعه انهم يكونون قدوة لنا بكل شي
فمثلا ليش الحبايب الدينين يتكشخون بسيارات أمريكية وأوروبية؟
مو الأولى انهم يساهمون في دعم الصناعات الاسلامية ويشترون السيارة الماليزية الاسلامية اللي فيها بوصلة مكة
والا المسألة وما فيها انهم يأمرون الناس بالمعروف وينسون أنفسهم؟

Tuesday, February 12, 2008

اقتراح عبيط لشعب شخبط شخابيط

بما ان وايد من النواب وأعضاء المجلس البلدي رافضين ازالة التعديات على أملاك الدولة
فآنا أتقدم باقتراح جدا عبيط لشعب تعود على الخرابيط وعشق أغنية شخبط شخابيط
وهالاقتراح راح يحفظ ماي ويه الحكومة المصرة على الازالة (من أمه وأبوه ويده ويدته آنا معاها بهالقرار) وتلبي رغبة الشعب الأبي اللي دوم يحترم ديرته (اي طل وبلي) وتخلي النواب يتفاخرون فيه جدام ناخبينهم
الاقتراح يسلمكم ربي اهوا الآتي
تحويل جميع مناطق الديرة السكنية لمناطق استثمارية (اللللله...ودي ودي أصدق بس قوية قوية) وهني نحقق مطالبات الشعب والحكومة والنواب.....اشلون؟
السرداب مواقف سيارات
الأرضي حمام سباحة
الأول ديوانية
الثاني حق الزوجة الأولى وعيالها
الثالث حق الزوجة الثانية وعيالها
الرابع حق الزوجة الثالثة وعيالها
الخامس حق الزوجة الرابعة وعيالها
السادس حق العشيقات
ومن السابع لي المية تأجير
وعلى شرط تكفل الدولة بالبناء وترجع فلوسها مو من المواطن لا من تأجير بقية الأدوار واللي بقول اشلون الأدوار بتتأجر أرد وأقوله نخلي تجار الاقامات اييبون لنا عمالة ونسكنهم بهالعمارات ويدفعون ايجاراتها غصب طيب
وهني تتحقق وايد أشياء
أولا الحكومة حققت اللي تبيه بتحويل الكويت لناطحات سحاب وتفتك من حنة النواب والشعب ومن التثمين ومن التعدي على أملاك الدولة
ثانيا المواطن تحقق له كل اللي يبيه..اللي بتزوج بس وحدة كيفه واللي يبي ثنتين هم كيفه واللي ثلاث وأربع هم كيفه واللي يبي سرسرة وعشيقات هم كيفه وعنده حمام سباحة وديوانية ومواقف
ثالثا واهوا الأهم تحقيق حلم سعد الفرج بتحويل الديرة حق امية طبقة
هاااااااااااااااا اشرايكم بهالاقتراح؟

Monday, February 11, 2008

مخ حده عبقري

لجنة محاربة الظواهر السلبية والنكد والهم والحزن البرلمانية عن الدورة الخليجية الرياضية للفتيات
تحكيم وجمهور نسائيان ونقل تلفزيوني بلا تلصص
زييييييييييييييين
النقل التلفزيوني بعد مو حرام؟
يعني يالأغبياء اذا أكو نقل تلفزيوني ليش عيل بتمنعون الجمهور من الحضور؟
يا الخبول اللي ناوي شر ماكو داعي يروح حق دورة خايسة ما فيها الا خمس دول
اللي فيه شر يروح يقز بالمجمعات أحسن له
بعدين آنا بفهم شي
ليش معظم الدينين ما يفكرون الا من السر ونازل؟
ومع ان أوجه الحياة متعددة بس ليش اهما ما يفكرون الا بالجنس؟
وليش بهالوقت تذكرت الرويشد واهوا يقول
يبيلك قلب ما يتعب ولا يهدا ولا يرتاح
أما قلبي يا روحي ما يقدر يشيل جراح

Sunday, February 10, 2008

تبجح في غير محله

يتبجح التيار المتأسلم هذي الأيام بأن منع الاختلاط يطالب فيه حتى بعض مواطني الديمقراطيات الغربية المتقدمة
واحنا نرد ونقول صح...أكو ناس بهالديمقراطيات يطالبون بهالشي
وعشان جذي كانت هذي الدول ديمقراطية ومتقدمة...ليش؟
لأنهم استطاعوا احتواء كل الآراء...ولأنهم احترموا كل الاجتهادات
وخير مثال على هالشي ان احنا نلاقي عندهم المسايد المنتشرة بمدنهم اللي المفروض انها مسيحية
بينما احنا تقوم القيامة عندنا لو بغوا يبنون لهم كنيسة والا حتى لو بغوا يوسعون كنيستهم
لا ومو بس جذي احنا حتى نمنع بعض الأقليات المسلمة من اقامة منشآتهم الخاصة فيهم مثل ما صار مع البهرة أو نقلل من وجودها مثل ماهو حاصل مع الشيعة...وفي ايران لا يسمح للأقلية السنية بحرية اقامة منشآتهم وفي بعض الأحيان حتى شعائرهم ما يؤدونها بالعلن
ونقول عقب كل هذا ان احنا متسامحين...احنا نعم عندنا دين متسامح بس عندنا فكر غير متسامح
وبالتالي وعودة على موضوعنا الأساسي فلما الغرب سمح باقامة المنشآت التعليمية غير المختلطة احتراما لآراء بعض الناس
احترم في الوقت نفسه الراي الآخر وحقهم باقامة منشآتهم التعليمية المختلطة واللي يحترم فيها الجنسين بعضهم بعض
في الوقت اللي يبون عندنا منع التعليم المختلط حتى في المدارس والجامعات الخاصة
عرفتوا الحين الفرق بينا وبينهم
اهما يحترمون كل الآراء القابلة للتطبيق
واحنا نفرض الراي الواحد غصب طيب حتى لو كان غير قابل للتطبيق
وسؤال على الطريج
هل أدى التطبيق المتشدد للدين أيام حكم طالبان الأفغانيين لعدم تصدير المخدرات؟
هل انتهت المشاكل الأخلاقية في الدول اللي تطبق منع الاختلاط؟

Thursday, February 7, 2008

علي بابا يعود للواجهة

أكد وزير النفط بالوكالة أن قرار لجنة التحقيق بحفظ البلاغ عن المتهم علي الخليفة لم يقنع المواطن العادي بأن العدالة أخذت مجراها
وأن قرار اللجنة بالحفظ باطل لخلوه من الأسباب
وأكد كذلك أن التقارير الحسابية أكدت وجود تحويلات مالية بملايين الدولارات(حسافة نسيت أعطيهم حسابي) بين حسابات الوزير المتهم وحسابات بقية المتهمين وأن لجنة التحقيق لم تلتفت الى كل هذه الأدلة
هذا مو حجيي آنا...هذا حجي وزير بالحكومة
وبالتالي
اذا كانت أكو أدلة واضحة وضوح الشمس مثل ما يقول الوزير
واذا هالأدلة متوفرة وموجودة بحوزة الحكومة اللي قدمتها حق لجنة التحقيق
واذ عرفنا ان أكو حكم سابق ضد المتهم علي بابا سنة 1996 سقط مو لشئ الا لخلوه من تاريخ الصدور
عيل ليش كل هالطوالة بالقضية؟
وليش ما يعتمدون على كل ما سبق وينهون هالقضية؟
بس السالفة شكلها امتداد للصراع اللي قاعد يصير بالديرة بين أطراف متعددة بالأسرة
وامتداد للخبطة الحكومية

Wednesday, February 6, 2008

يا علها دوم مو يوم

التحركات اللي قاعد يقوم فيها بالفترة الأخيرة التحالف الوطني الديمقراطي تستحق الاشادة والمساندة على الأقل من وجهة نظري الشخصية
ونتمنى ان هالتحركات الجادة لاصلاح أوضاع الديرة وقوانينها البالية والمتخلفة تستمر دوم مو يوم
في الوقت نفسه لازم نذكر نفسنا ان اللي انهدم بقرابة ثلاثة عقود متتالية ما راح ينبني بين يوم وليلة
لكن مع المحاولة للاصلاح ومع الصبر على الوقت اللي راح تاخذه عملية الاصلاح هذي راح نوصل ان شاء الله ان احنا نبني هالأرض اللي ماقصرت معانا ونشد على ايد التحالف الوطني اللي بالأمس وقفوا وقفة قوية مع وزيرة التربية واليوم يكملون جهودهم لاسقاط القانون غير الدستوري المتعلق بمنع الاختلاط علما بأن المنع الشرعي كان على الخلوة اللي تختلف اختلاف نهائي عن الاختلاط
ونتمنى من كل صاحب نفس ليبرالي حر ان يوقف مع هالتحركات الجادة باذن الله
وان ما ينطبق علينا قول بشار بن برد
لقد أسمعت لو ناديت حيا...ولكن لا حياة لمن تنادي
فلو نارا نفخت فيهالأضاءت...ولكنك تنفخ في الرماد
وسامحوني اذا لخبطت بالأبيات لأني أذكرها من أيام الثانوية قبل الغزو

Tuesday, February 5, 2008

على ذمة جريدة العفن والوثن والفتن اللي مالها ذمة

الحكومة تراقب المدونات السياسية باعداد مشروع قانون لهذه المدونات
على رغم الرقابة الذاتية الراقية والمسؤولة اللي قاعد يتحلى فيها 99% من المدونين
وعلى رغم ان التدوين ياخذ وايد من وقتنا وبدون أي أجر مقابل هالشي اللهم الا حب ديرتنا واخلاصنا لها ورغبتنا في علو شانها
وعلى رغم انتقادنا للأخطاء بهدف اصلاحها عشان خاطر هالأرض الطيبة
الا ان الكلمة الحرة تكون صعبة على قوى الفساد
الا ان الكلمة الصادقة تهز كراسي الحرامية
الا ان الكلمة الصافية النقية تزلزل عروش ضعفاء النفس
حطي يا حكومة مليون قانون وقانون
قيدينا يا حكومة بالسلاسل
بس تأكدي ان احنا راح نلقى مليون طريقة وطريقة لحب هالأرض
لخدمة هالوطن
في النهاية مستعدين نموت
بس تحيا أمنا الكويت

Monday, February 4, 2008

فوق شينه...قواة عينه

تظاهرة لأصحاب الديوانيات المخالفة والمتجاوزة على أملاك الدولة احتجاجا على ازالتها
والله مسخرة...متعدين على أملاك الدولة لا ولهم عين انهم يحتجون
بعدين احنا طول عمرنا ندري ان الديوانية جزء من البيت مو بره على الرصيف
بس تدرون...آنا هم بحتج معاهم تدرون ليش؟
لأن بيتنا يم دوار الكرة الأرضية بمشرف...عاد آنا قاعد أفكر أشيل هالكرة الأرضية وأحط لي مكانها خيمة حق الربع
تدرون أبي ديوانية وببيتنا ماكو مجال...وعقب جم سنة استولي على الدوار بوضع اليد وأبيعه
والا الحكومة تيي وتثمنه لي...كيفي كويتي فوق القانون
أصلا القانون سووه حق الأوادم مو حق الكويتي

Sunday, February 3, 2008

نصيحتك خلها لك

الخرافي ينصح الطويل بالتعاون مع المجلس وعدم استخدام كلمات لا تتحمس للديمقراطية
آآآآآآآآآآآه...أسمع حجيك وأصدقك ... أشوف أفعالك وأتعجب يا الخرافي
وهالنصيحة الواجب انك توجهها حق نفسك أول عشان الناس يقدرون يقتنعون فيها منك
واللي بيته من جزاز ما يحذف الناس بالصخر يا الخرافي
والسؤال الحين
هل الخرافي فعلا يلتزم بالدستور والقانون ودولة المؤسسات؟
هل الخرافي أساسا ديمقراطي؟
والا السالفة مع الخيل يا شقرا وبس