Monday, March 31, 2008

همسة انتخابية

اليوم وفي ظل الدوائر الخمس صار من الصعب على المرشح المستقل الفوز بالانتخابات
وبالتالي الجميع قام يستعد للتحالف ضمن قوائم انتخابية من اربع اسماء تمثل العدد المسموح فيه للتصويت
وهالشي مع الوقت راح يغير الفكر الانتخابي بالكويت من التفكير المستقل الى تفكير انشاء القوائم الانتخابية واهيا اللي راح تمهد للانشاء الفعلي للاحزاب السياسية واهوا التطور الطبيعي لأي ديمقراطية بالعالم
لكن للاسف الشديد ان في ظل زحمة الاسماء المرشحة لانشاء هذي القوائم ما شفنا اي مجال لادخال المرأة كمرشحة ضمنها
حتى قوائم التكتلات المساندة للمرأة مثل المنبر الديمقراطي والتحالف الوطني الديمقراطي ماطرحوا اي اسماء محتملة ضمن قوائمهم
يا ترى شنو اهيا الاسباب
هل اهيا ضعف اللوبيات النسائية مثل الجمعية الثقافية النسائية والنساء بشكل عام؟
هل اهيا استمرار للنظرة الذكورية لمجتمعنا؟
هل اهيا فشل المرأة في اقناع هذي القوائم بقدرتها على الفوز؟
والسؤال الاهم
ليش غضت التكتلات الليبرالية النظر عن اسماء محتملة لترشيح المرأة...سؤال للتحالف الوطني والمنبر الديمقراطي؟

Sunday, March 30, 2008

شر البلية ما يضحك

الحرمنة والبوق بلوة...بس حراميتنا يحليلهم يبوقونا بس يخلونا نضحك شوية على طريقة بوقتهم
والله خوش مشروع....ليش؟
أولا
المشروع راح يساهم بايصال البث الاذاعي الكويتي لجبال الهملايا الكويتية وراح يساعد مواطنينا من سكان هذي الجبال الشاهقة بالاستمتاع بهذا البث (من حلاة الاذاعة وبرامجها عاد) طبعا ماعدا مارينا اف ام
ثانيا
نظرا لاتساع مساحة الدولة وامتداد صحاريها من الخليج للمحيط فان هذا المشروع راح يساهم بايصال البث لصحراء الدبدبة وصيهد العوازم ووادي الباطن علما بأن أقصى مسافة من شمال لجنوب الديرة اهيا قرابة ال300 كلم ومن الشرق للغرب قرابة ال 200 كلم...وبما اني قزيز ومستكشف عظيم (حتى سألوا سدرة عني) وأحوس بالديرة من مزارع العبدلي لي الوفرة ومن اللياح لي مركز الخباري ومن الجهراء لي السالمي والشقايا مرورا بالأطراف ومن خور عبدالله لي قاروه مرورا بفيلجا وعوهة ومسجان وكبر وام المرادم استطيع التأكيد لكم ان البث الاذاعي واصل حق هالأماكن من غير هالمشروع
ثالثا
اللي يبي يبوق خل يبوق بطريقة ذكية مو بهالطريقة الغبية يا حلوين...وللتعلم على أفضل طرق النصب والنهب والبوق ما عليكم الا أخذ دورة تدريبية بجريدة الوثن والفتن لصاحبها علي بابا

Thursday, March 27, 2008

يا هلا بالقانون

الفرق بين الفوضى والديمقراطية شعرة صغيرة
هالشعرة اهيا القانون
اذا الدولة التزمت بتطبيق القانون على الكل تحولت الفوضى لديمقراطية ترقى بالدولة للتنمية والتطور
واذا تم كسر القانون تحولت الديمقراطية لفوضى وفقدت الدولة هيبتها وتخلفت
امس انتقدنا الحكومة على كسرها للقانون اللي ادت لفوضى عشنا فيها طيلة اربعة عقود
اليوم وبعد الاجراءات الحكومية الجادة لتطبيق القانون واعادة الهيبة للدولة والدستور ومؤسساته فاحنا نشيد بهذي الاجراءات ونوقف معاها عشان ننعم بالنهاية بديمقراطية حقيقية بدل فوضى القبلية والطائفية اللي كنا عايشين فيها
اليوم نقول للحكومة لا تتراجعين كالعادة عن التزاماتج تجاه رفاهية ومساواة جميع ابناء الشعب جدام القانون
واللي يتحجج بان التشاوريات مثلها مثل اختيار التكتلات لمرشحينها نقوله انت غلطان ونص
التكتل فيه الحضري والبدوي والعيمي والسني والشيعي يعني يمثل كل اطياف المجتمع الكويتي علما باني ضد اي تكتل قبلي او طائفي
اما تشاوريات القبائل فما فيها الا ابناء القبيلة وبالتالي مرشحها ما يمثل الا قبيلته والقبيلة مو اهم من الكويت واهلها
الكويت فوق الكل....الكويت فوق الكل....الكويت فوق الكل
برافو يا حكومة....برافو يا وزارة الداخلية

Wednesday, March 26, 2008

من صج والا مجرد بيع حجي

نتمنى يا وزير الاعلام تطبيق حجيك قولا وفعلا
مو بس قولا

Tuesday, March 25, 2008

نبي شوية احترام حق عقول القراء

اولا
آسف على الغيبة...شوية كآبة كانت فيني وراحت
المهم
امس جريدة القبس وبافتتاحيتها حطت موضوع تدعو فيه الحكومة للتشدد في تطبيق قانون تجريم الفرعيات وهذا شي حلو ومطلوب
بعدين يتفاجأ القارئ انهم حاطين بآخر الصفحة رقم 15 على اليمين اعلان عن وحدة من الفرعيات
بذمتكم..اشلون جريدة افتتاحيتها تدعو لمحاربة الفرعيات وبنفس الوقت تقبل نشر اعلان عن وحدة من الفرعيات؟
واذا كانت الفرعيات مجرمة بالقانون فالاولى ان الاعلان عنها يعتبر جريمة بحق الوطن...لكن للاسف الظاهر ان عشان جم بيزة اهيا قيمة الاعلان اقبلت الجريدة انها تخون بسببهم مبادئها وافكارها علما باني لما انتقد تصرف جريدة القبس فلأني اعتبرها جريدتي الاولى واحب انها تصحح الخطأ اللي طاحت فيه
ولو كان هالفعل من اي جريدة ثانية جان ماهتميت
بس انه يصدر من جريدة لها مبدأ لخدمة الوطن فهالشي يحبط الواحد ويشكك بمصداقيتها

Wednesday, March 19, 2008

أساس الحكم

أساس الحكم
تمسك بالدستور
تطبيق للقانون
العدل بين الرعية
هالاشياء اذا مالتزم فيها اطراف الحكم من سلطة تنفيذية وتشريعية فعمرها الديرة ما راح تنمو وتتطور وبنبقى على طماط المرحوم وللخلف در
علما ان احنا وبالسنوات الاخيرة ما كان عندنا سلطة تنفيذية ولا تشريعية
كان عندنا سلطة ( بفتح السين واللام والطاء ) تنفيذية وتشريعية
لا وطعمهم حده خايس وما ينبلع

Tuesday, March 18, 2008

قراصنة الكاريبي

يعتبر فيلم قراصنة الكاريبي من اروع ما قدمت السينما العالمية من افلام اسطورية خيالية بالسنوات الاخيرة وزاد الفيلم تشويق واثارة قيام الممثل جوني ديب ببطولته باسلوبه الشيق والجاذب للانتباه
اليوم تقدم سينما الواقع الكويتية فيلم اسطوري آخر لكنه مؤلم ويقوم ببطولته كل من الحكومة ومجلس الامة والاسرة وقوى الفساد والشعب بكافة فئاته...الفيلم لم يتفق على تسميته للحين لكن الاسم الاقرب حقه اهوا قراصنة جون الكويت
وعلى عكس شهامة وبطولة قراصنة الكاريبي اللي يتخلون فيها عن طبيعتهم المتمثلة بالقرصنة والنهب لمواجهة الظلم
يبقى ابطال فيلم قراصنة جون الكويت على طبيعتهم الجشعة من قرصنة وبوق ونهب لارض وبحر الكويت وان طالوا سماها هم بعد ما راح يترددون عن نهبها...والمشكلة بقراصنة الجون ان كل واحد فيهم يعتبر نفسه ملاك ومنقذ للديرة واهما كلهم شياطين وكل شيطان فيهم يقول زود الحرمنة عندي
المهم الحين
شنهو راح تكون نهاية الفيلم الكويتي؟
ومنهو راح يكون منقذنا من هالقراصنة؟
العلم عند الله

Monday, March 17, 2008

اشبقى فيج

ماني شاعر ولا فنان
بس من كثر القهر والظلم بقول هالابيات
ديرتي صار فيها للحرامي الف مكان ومكان
وللسفيه صار فيها منزلة وشان
والشريف صار فيها منذل ومهان
اشبقى فيج يا ديرة العز والخير ما هان
اهلج يا ديرتي كانوا فخر للاوطان
واليوم صاروا للنصب والبوق عنوان
وبسمة ارضج اللي كنا نشوفها بويه كل انسان
صارت دمعة قهر يبجيها الاطفال والشيبان
حتى وحدة ناسج اللي كانت سيف يدحر كل عدوان
لعبوا فيها ليما صرنا مسخرة لكل البلدان
يا ديرة اللولو والمرجان
عيالج باعوج للذل والهوان
اليوم احلف بربي ان لولا خوفي من الله سبحانه وتعالى وخوفي من حسابه وعقابه ثم حبي لديرتي الكويت جان بقت وصرت حرامي وآنا مرفوع الراس مثل كل الحرامية اللي بالديرة وقاعدة تعزهم الحكومة وترفع من شانهم وتكسر الدستور والقانون ودولة المؤسسات عشانهم واذا كانت السالفة جذي فآنا عيل اعيد عليكم اقتراح توزيع مليون دينار حق كل كويتي وخل كل واحد عقبها يشوف طريجه احسن له لأن على هالحال الحرامي قاعد يستفيد واللي محترم نفسه قاعد يموت من القهر فوزعوا علينا خير ارضنا احسن لنا وعقبها مانبي منكم شي

Thursday, March 13, 2008

خواطر الروح

منحنا الله عز وجل نعمتين واهما من افضل النعم ان تم استخدامهما بالطريقة الصحيحة والسليمة
الاولى نعمة العقل...والثانية نعمة القلب
تتمثل قوة العقل في ابداع الفكر...وتتمثل قوة القلب في رقة الاحساس
في الدول المتحضرة
يستخدمون العقل لترشيد جموح احساس وعاطفة القلب لأن العاطفة متى ما طغت اعمت العين
ويستخدمون القلب لتلطيف مادية تفكير العقل فالعقل متى ما طغى تسبب في قسوة النفس وجلافتها
اما الدول المتاخرة عن ركب الحضارة
فاهما بغالبيتهم اما انهم يستخدمون طغيان العقل وبالتالي نشوف عندهم دكتاتورية الحاكم والمحكوم
او ان الغالبية ينسون شي اسمه العقل وتتحكم فيهم عاطفة جياشة وهالعاطفة اما انها تكون دينية او قبلية
العاطفة الدينية تؤدي الى الطائفية والتعصب الديني
والعاطفة القبلية تؤدي الى تفكك الدولة لمجموعة من العشائر
وفي الحالتين بطغيان العقل او طغيان القلب تكون النتيجة نهاية الدولة
يا ترى احنا اهني بالكويت وين نكون...مع الدول المتحضرة والا المتاخرة؟

Wednesday, March 12, 2008

يا حلوك والله

اقروا اول شي هالخبر
زين اذا سلمنا بصحة حجيك واستنتاجاتك
ما تقول لنا يالحربش ليش بالستينات لما ما كان عندنا هالكم من الجمعيات اللي تلعب على وتر الدين وكانت الديسكوات مرخصة بالديرة ومعاها الويسكي بكل انواعه مرخص والتعليم كان مشترك والانفتاح بالبلد كان بكل اتجاه لدرجة ان بناتنا قطوا العباية والبوشية وبدت البعثات الدراسية للبنات بره الديرة....الخ..ليش بذاك الوقت كانت الديرة بخير والفلس فيه البركة؟
ليش من عقب ماصكوا الديسكوات وامنعوا الويسكي وحاربتوا التعليم المشترك والمرأة وانتشرت جمعياتكم الدينية اللاعبة على اوتار الدين انتشرت عندنا الجرايم وشقق الدعارة وزاد تهريب الويسكي والمخدرات والواسطة والرشوة والبوق اشكره؟
تدري ليش؟
لأن الناس اول كان قلبها ابيض ونظيف...الناس اول كانت فيها الطيبة بالفطرة
الناس اول كانوا دينين بدون تطرف...ومنفتحين بدون تحلل وتسيب
اليوم وبمباركة جمعياتكم المتاسلمة صاروا الناس نار وشرار...صار قلبهم اسود..ومن كثر الكبت صاروا مثل الذيابة كل واحد ينهش بلحم الثاني...انتشرت القبلية والطائفية بسببكم...صارت العنصرية عنوان لتعاملنا مع الطرف الآخر
واذا كان اكو غضب علينا من ربنا فانتوا اللي يبتوه بتلاعبكم بالدين لهدف الوصول لمصالحكم الشخصية
بعدين تعال
مو يمكن اللي قاعد يصير ابتلاء من الله لعباده المؤمنين؟
بس الظاهر انك تبي تمشي فكر الناس بالاتجاه اللي جمعيتك تبيه وبس

Tuesday, March 11, 2008

والله عيب

يا جماعة
اكو حكومة بالعالم تقر زيادة لكل الموظفين بعدين يطلع وزير ماليتها ويصرح بتأجيل الزيادة لدواعي تحديد الشرائح المستحقة حق هذي الزيادة؟
زين لما اقروا الزيادة للكل وين كان وزير المالية وما حدد من وقتها هذي الشرائح؟
بعدين الزيادة مو اقرت بناء على دراسة البنك الدولي على حد زعم الحكومة فهل من المعقول ان الدراسة ماحتوت هذي الشرائح؟
والا السالفة مذلة خلق الله وجن الخير خير الحكومة مو خير الديرة ومواردها؟
بذمتكم عاد هذي حكومة دولة والا حكومة سوق الصفافير؟
زين حكومة تتخبط قراراتها كل يوم عن يوم اشلون ناتمنها على دستور وقوانين ومؤسسات الدولة؟
حكومة ماتعرف كوعها من بوعها اشلون ناتمنها على صون حرية الفرد؟
حكومة ماردى من المربوط الا المفتلت اشلون ناتمنها على مستقبل عيالنا؟

Monday, March 10, 2008

العامل المشترك

النص الاول من الستينات
اقرار الدستور بتعاون مثمر بين حاكم متنور وشعب حر
النص الثاني من الستينات
بداية الهجمة الشرسة لهدم الدستور وكسر القانون وتخريب دولة المؤسسات
السبعينات
التحالف مع قوى التخلف المتاسلمة وبداية رفع شعار للخلف در
الثمانينات
اعادة تقسيم الدوائر لخمس وعشرين دائرة وتكريس التجمعات القبلية والطائفية
التسعينات
بداية تقييد موسع لحريات الفرد على اساس تقاليدنا وعاداتنا وفهم خاطئ للدين وجنه الكويتيين ما كانت لهم لا عادات ولا تقاليد ولا دين من 300 سنة
العقد الاول من الالفية اليديدة
بداية ظهور اوجه تمزق وحدة الديرة بين سني وشيعي وحضري وبدوي
السؤال اهوا التالي
منو اهوا العامل المشترك بكل هذا؟
العامل المشترك
اهوا حكوماتنا المتعاقبة التعيسة اللي دوم تسمي نفسها رشيدة

Thursday, March 6, 2008

هذا اللي كان ناقصنا

يعني الحين احنا ناقصنا ائمة ومؤذنين بالديرة عشان اييبونهم من بره
زين...واذا كان ناقصنا ائمة ومؤذنين فمو المفروض انهم اييبون مؤذين وائمة من دول متطورة من هذي الناحية؟
مو المفروض اييبونهم من مصر مثلا؟
الامامة ماهي بالشي الهين
الامامة فن خطابة واسلوب فكر متميز وعقلية متسعة الادراك
هذا المفروض اللي يكون بالامامة
بس الظاهر ان احنا ما لقينا ائمة ومؤذنين الا باليمن اللي للاسف تمزقها التناحرات القبلية
والظاهر ان احنا حابين نتعلم منهم فن التشتت القبلي والطائفي
والا اللي آنا اعرفه ان كل دول العالم تستقطب الكفاءات بالمجالات اللي تعتازها دولهم
الا احنا كل شي عندنا بالمقلوب ولا بغينا انييب من يشغل الوظائف الشاغرة يبنا ناس من دول يفترض ان احنا احسن منها علميا وتطورا
والسؤال الحين
هل الهدف من العنوة وجلب العمالة عشان تستفيد منهم الدولة والا عشان اهما يستفيدون من خير الديرة وبس لا ويزيدونا تخلف على التخلف اللي احنا فيه؟
ـــــــــــــــــــــــــــــــــــــــــــــــــــــــــــــــــــ
ملاحظة
الف رحمة عليك يا استاذي الكبير احمد الربعي
وادعو الله العلي القدير ان يدخلك فسيح جناته
يابوقتيبة

Wednesday, March 5, 2008

ودوني البحر...تراني ميت قهر

منو اللي قال ان الحياة غالية بالكويت؟
اقروا وحكموا بنفسكم....بس لا تموتون قهر

Tuesday, March 4, 2008

منو الغبي اللي بيصدقكم؟

الحكومة : ازالة جميع اشكال التعديات على املاك الدولة بالوقت المحدد بما فيها الدواوين ولا استثناء لاي كان
والله تنطبق عليهم اغنية ميسم نحاس اللي تقول فيها
كداب كبير

Monday, March 3, 2008

أسئلة حيرتني

بكل دول العالم (المحترم طبعا) يقطع رئيس الحكومة اجازته في حال حدوث اي امر طارئ بديرته
الا احنا
من يصير عندنا مشكلة ياخذ رئيس حكومتنا اجازة وينهاش بره

ليييييييييييييييييييييييييييش يعني؟

___________________________

يا جمعية الاصلاح...يا جمعية حلال علي وحرام على غيري

بالمصري بسالكم

الا يعتبر هازا من الاختلاط الذي تحاربونه كزاكم الله عنا وعن المسلمين الف خير؟

الن يؤدي هازا الى اسارة (اثارة) الشهوة الكنسية (الجنسية) حسب ما صرح به عظو كمعيتكم العتيئي؟

يعني ما لئيتوش مستشارة للدورة بدل المستشار؟

اللنك



Sunday, March 2, 2008

عدالة دولة اللاقانون

الله...اشحلاة دولة اللاقانون ! بدولة اللاقانون كل شي تبيه تسويه
دولة اللاقانون مثل الغابة ما يعيش فيها الا القوي....وحقك تاخذه بايدك
بدولة اللاقانون كل ما تقول للواحد شغلك غلط قال اشمعنى آنا يت علي يعني؟
بدولة اللاقانون بس يفصلون قانون للمديونيات حق اللي ما سدد واللي احترم نفسه وسدد خله يطق راسه باكبر طوفة
بدولة اللاقانون بس يحمون الحرامية اللي باقوا الديرة بايام الغزو واللي باقوا بدورة الخليج والنفط وياخذون اعلى المناصب
بدولة اللاقانون اللي يبوق مليون ينحط على الراس واللي يمشي تحت الساس ينداس
بدولة اللاقانون يدافعون عن التجاوزات على املاك الدولة بدون اي خجل او حياء
بدولة اللاقانون يسوون صندوق لسداد مديونية اللي راح واقترض بمزاجه وعقب ماستانس بفلوس القرض ما صار يسدد
وقيمة مبالغ الصندوق 300 مليون دك علما ان عدد الطلبات الاسكانية تجاوزت السبعين الف طلب...بذمتكم جم بيت ممكن ينبني بفلوس الصندوق؟وجم مدرسة؟وجم مستشفى؟ وجم جامعة؟وجم مشروع انمائي؟
كل هذا يتم في الوقت اللي تنتشر فيه الجمعيات الدينية بكل مكان
كل هذا يتم في الوقت اللي يقولون انه وقت الصحوة الدينية
كل هالشي يصير باسم الدين
وآنا اقول ان هالشي ما صار الا بتحالف الحكومة مع تيارات اللعب على اوتار الدين ونوم اهل الديرة بالعسل عن محاسبتهم
ملاحظة : على الرغم من عدم اهتمامي بالسياسة الخارجية وعلى الرغم من الغصة اللي فيني من الفلسطينيين الا ان الحق ينقال ان اللي قاعدة تسويه اسرائيل فيهم حرام ولا يرضي لا الله ولا خلقه والاسوأ سكوت العالم عن هالمجازر البشعة