حق الوزير

أي وزير بالعالم المحترم يكون من كامل حقه اختيار القياديين (واهني مانتحجى عن الموظف العادي) اللي يقودون معاه الوزارة ولعدة أسباب...منها تجديد الأفكار وفتح المجالات أمام القيادات اليديدة لاثبات جدارتها ومن أهم الأسباب ان يكون هناك اتفاق ما بين الوزير وقياداته بوضع الخطط وتنفيذها

وبالتالي كان من حق نورية الصبيح انها تقيل وكيل الوزارة وحسب القانون لأنها مو قادرة تتفق معاه لتنفيذ الخطط الموضوعة

وهم كان من حق الطويل الاحتفاظ بوكيل الوزارة خاصة ان محد قدر يثبت بالدليل القاطع فساد هذا الوكيل

بل ان حتى أعضاء الجمعية الطبية ماذكروه الا بالخير على عكس الحبيب الطبطبائي اللي يبيه غصب طيب

الغريب بالموضوع ان الوزير العليم(والشهادة لله آنا مالي عليه شي بس يبته بالموضوع للاستشهاد بحالته فقط) واهوا وزير نفط بالوكالة مو بالأصالة غير وبدل بالنفط والمؤسسات والشركات التابعة لها واهوا الوزير بالوكالة يعني المفروض انه كان يخلي هالشي حق الوزير بالأصالة وعلى الرغم من كل هذا محد اعترض ومحد فج حلجه وتحجى لأن هالشي من صلاحيات الوزير ومن خلاله راح يثبت نجاحه أو فشله وبعدين يحاسب

هل يعني هالشي ان اللي سواه العليم حلال ونفس الشي حرام على نورية والطويل؟

هل يعني هالشي ان ماراح يمشي بهالديرة الا اللي يحط له لحية ويقصر الدشداشة أو اللي تحط لها نقاب؟

هل وصلنا لمستوى من الانحدار ان ما يعيش عدل الا الجماعات الطفيلية على حساب الدين؟

______________________________________________

ملاحظة

أعتقد ان تحلطمنا وانتقاداتنا لازم تتحول من المدونات للواقع العملي من خلال المظاهرات

واتفق بهالشي مع الاخت دانة بيت القرين

وأتساءل بالفعل وينهم شباب نبيها خمس؟

يعني احنا مانتحرك الا لما يطيح الفاس بالراس؟