أذكر وآنا صغير اني كنت شيطان وابليس بس شطانة يهال
كنا ساكنين بذاك الوقت بالدعية وكان هذا بفترة السبعينات...ييرانا الجريبين منا كان منصور كويتي من أهواز العراق وبوحسين الكويتي العيمي الشيعي وبو محبوب الكويتي من السمر وأبوي النيدي السني
وكانوا كلهم يتيمعون بديوانية بو حسين
كنت لما اتشيطن يمسكني أبوي من أذوني بالديوانية ويقول لهم هذا ولدكم وعدوه واحد من عيالكم لي شفتوه غلط زفوه وكوفنوه وعطوه طراقين وأدبوه
كنا كويتيين وبس...ما يفرقنا شي...ماندري منهو النيدي ومنهو الأهوازي..منهو الأبيض ومنهو الأسمر...منهو الحضري ومنهو البدوي...منهو السني ومنهو الشيعي...مانعرف الا ان احنا كلنا من هالديرة...ييرانا كانوا أهل...كل يار يصون عرض ومال ياره مثل ما يصون عرضه وماله...كنت أحس الفريج كلبوه بيتي..أدش من بيت وأطلع من بيت...كنا كلنا اخوان
اليوم لما أتذكر ذيج الأيام أسأل نفسي وأقول
ليش اليار ماصار يعرف منهو ياره...ليش بكل خطوة ينقال هذا سني وهذا شيعي...هذا نيدي وهذا عيمي..هذا حضري وهذا بدوي
وين راحت طيبتنا...وين راحت نيتنا الصافية...ليش عقب ما كنا اخوان صرنا بالشوارع مثل الذيابة اللي تبي تنهش لحم الشياه
ومن يومها ضعنا وضاعت الديرة معانا
لأن الأوطان ما تحيا الا بأهلها
وللأسف احنا متنا وماتت الديرة ويانا
منو غيرنا للأسوأ...منو بدلنا من حال لي حال؟
منو المسؤول عن ضياع تسامحنا وتقبلنا لاختلاف الآراء؟
منو المسؤول عن تطرفنا وتشددنا؟
الناس؟ يمكن
الزمن؟ يمكن
الفلوس؟يمكن؟
بس الأكيد ان سياسات فرق تسد بين عيال الديرة الواحدة
واللي اتبعتها الحكومات المتعاقبة
اهيا أهم الأسباب
32 comments:
مرحبا
:)
يمكن الزمن اللي غير هالشغلات .. الدنيا دواره يوم لك ويوم عليك .. والناس مع تغييرات هالزمن تغيرت معاها
عموماً
برايي الاجابه هي .. قضاء الله وقدره
احنا على اخر الزمان واخر الزمان هذي ظواهره.. يعني اذا ماطلعت اليوم بتطلع باجر
والله يستر :)
مشاعر طيبة منك
:)
بس شنو تفسيرك اذا لعبارة ترددها
( الألمان الرحل )
؟؟
لاني ( كدت ) اظن فيك ظن سوء
شكرا
تفائل
فرق تسد
الطامة الكبرى
على فكره هذا الوضع طبيعي بالنسبه للتطور التكنولوجي الهائل والسريع
حتى الدول الصناعيه الكبرى تعاني من ندرة سماحة الماضي
كل جيل يختلف عن اللي بعده
سيليزيا
صح أكو شي اسمه قضاء وقدر
بس ياختي لو بنعتمد على هالشي جان محد بنى ولا احد عمر
احنا مسيرين بأشياء بس هم مخيرين بوايد أشياء والعلاقات بين البشر احنا مخيرين فيها
بعدين ما يصير نقول خلاص هذا آخر الزمان وخلنا ننطر ليما يطلع المهدي المنتظر وليما ينزل لنا سيدنا عيسى
أحلى مهندسة
يا مهندستنا
والله آنا احترم كل الأجناس والألوان
ولما قلت الألمان الرحل ما كان قصدي بدو الكويت اللي دوم كان ينشد فيهم الظهر
قصدت اللي يوا الكويت وكل همهم بيزاتها وبس
والدليل اني تحجيت على علي الخليفة واهوا حضري
وتحجيت على متطرفين الشيعة
الشيعي والسني والحضري والبدوي اللي يعز الكويت على راسي من فوق
واللي يعتبر نفسه مجرد عابر سبيل واهوا يشيل جنسيتها فهذا تحت ريولي
مطقوق
آنا لو مو متفائل
جان ما لقيتني أكتب بالمدونة
أهم شي انك مريت علينا
بس
للأسف انها طمت علينا
براك
بس اهما تطورهم أكبر منا
ورغم ذلك سماحتهم أكثر منا
وعلى الرغم من ان احنا دوم نتفاخر بسماحة الاسلام واهوا فعلا دين السماحة بس مانطبق منه الا الحجي
وين نرد مثل أول إذا حامينا بيصير بدون
أنعم و أكرم
مالت على الحكومة زين
سدرة
معاج
ودي أقول وأبني عالورق بيت من الشعر
ودي برايي أصرح وبين الخلايق ينشر
أبي اقول اللي بقلبي قبل لا يفول وينفجر
جان زين العوي يستقيم من عليه نأشر
السالفة معقدة ويبيلها من يقول انا لها وعن الجم يشمر
إنت خليني أصلح كمبيوتري وبكل خير أبشر
الزين
صح لسانج
ان شاء الله كمبيوترج يتصلح
الي سواها اهم طيور الظلام الي قاعد اكتب عنهم ....
كلامك مختصر ومفيد بس وين الي يفهم يعطيك العافيه
a7La eNG
مثل ما قالج ي رد اطول من هذا عندي لما قالها فتى الجبل وفي واحد ثاني عند العرزاله
ظل بيها عيال ديرة
مهندس
الله يعافيك
عاجل
ما ظل بيها
في بعض الدول تجد اختلافات بالعادات بين الناس واحيانا حتى المظهر يدل على ان فلان من منطقة وفلان من منطقة اخرى , وهذا امر طبيعي .
المشكلة عندنا اختلاط كل شيئ بالسياسة , فتجد ان القبلية استخدمت كسلاح ضد الوطنيين , والدين , والطائفية , وكل شيئ استخدم كسلاح من اجل السيطرة وبسط النفوذ .
فرق تسد
ليش تدور الأجوبة و هي بين يديك
نحن من تغير .. نحن الملامون .. نحن من نربي أطفالنا أو تركنا تربيتهم لغيرنا
نحن و فقط نحن
!!
و حتى نعترف بأخطائنا لن يتغير شيئ
ويييييييييين زمان أول وزمن الحين
ترى الدنيا تغيرت
امي ولا أبوي يوم يسولفون عن أيام أول
أستغرب
كان الفريج عبارة عن أسرة وحدة
كلهم مترابطين ومتماسكين
وعلى قلب واحد
بس الحين وييييييييين
حمد
الأمل في الاصلاح يتضاءل
حمودي
الخطة اللي دايما تجيدها حكومتنا
حلم
راح الزمن الحلو
الدنيا
الحين اليار ما يعرف ياره
دمعت عيني يوم قريت هالبوست
مادري كسرت خاطري والفريج كله متعاون عليك ويطقك لي تشيطنت
:Pp~
ولا دمعت عيني على الكويت
:(
ربينا على ان يكون الانتماء الاكبر للكويت،مع الاعتزاز بعوائلنا واهلنا
بس ما ادري شلي قلب الدنيا وصارت اصولنا ومذاهبنا اهي اهم من ديرتنا
!!
اتذكر وانا صغيره سمعت سالفه بالمدرسه عن الاصل والفصل والشيعه والسنه وييت اركض اسئل يدي
الله يرحمه عنا وعن بيت فلان وعلان
وفلان شيعي ولا سني؟
تدري شنو سوا؟
طقني على حلجي
قالي عيب تتكلمون عن هالسوالف
قولو احنا كويتين وبس
!!
ومن يومها الحجوة باذني
راح الله يرحمه وتمت كلمته
عيب
!!
فعلا عيب
يهال ما طلعو من البيضه
لقطو هالسوالف من اهلهم
شيعه وسنه وحضر وبدو
وعاشو من خلالها
ناسين الحضن الاكبر اللي جمعهم وهو الكويت
:(
استكانة
الله يرحم يدج
هذا يدل على طيب معدنه وأصله
:)
كون أن الشاشة لاتكون أبلغ من واقعنا الملموس
فأنا سأضع بعض النقط علك تراها جيدا وتوصلك إلى المسؤول
فنحن منذ أن ... والطائرة .. والمقهى الشعبي.... و ... و الفاو ..
و ... و ... هل أكمل
:)
---------------------------------
منو المسؤول عن ضياع تسامحنا وتقبلنا لاختلاف الآراء؟منو المسؤول عن تطرفنا وتشددنا؟الناس؟ يمكنالزمن؟ يمكنالفلوس؟يمكن؟بس الأكيد ان سياسات فرق تسد بين عيال الديرة الواحدةواللي اتبعتها الحكومات المتعاقبةاهيا أهم الأسباب
---------------------------------
سيدة نفسي
كملي يا يبه كملي
شكلك تدري بس تبي توديني بدهية :)
سيدة
خلاص لا تكملين
وما عاش اللي يوديج بداهية
Post a Comment