وزارة الاعلام وكبت الحريات تمنع اقامة الحفلات الغنائية براس السنة الميلادية
وبعدين يقولون ليش الناس بكل عطلة تهج وتسافر
ويقولون بعدين ليش الحفلات الخاصة بالشقق والمخيمات والشاليهات مع ما يمكن أن يرافقها من خرابيط وعربدة
مو يا بشر انتو اذا منعتوا الحفلات اللي اهيا تحت عيونكم راح يهجون خلق الله ويسافرون حتى بهالأجواء الحلوة
مو يا أوادم انتو اذا منعتوا الحفلات اللي تحت نظر الأهل راح يتجهون الشباب حق البديل واللي اهوا الحفلات الخاصة اللي ممكن يكون فيها الخراب
وعلميا معروف
ان لكل فعل ردة فعل معاكسة له بالاتجاه ومساوية له بالقوة
وبالتالي لمصلحة منو تمنعون الحفلات البريئة العامة اللي تحت نظركم ونظر الأهل؟
ليش ما تبون الناس يستانسون
واللي ما يبي هالحفلات لا يروح لها
وأعتقد ان حفلات هلا فبراير أثبتت نجاحها أخلاقيا وسياحيا وترفيهيا
فليش التضييق على خلق الله يا وزارة محاكم التفتيش الدينية؟
_______________________
ميري كريسماس
حق كل اخواننا وخواتنا المسيحيين عامة
وحق الكويتيين المسيحيين خاصة
وعلى هالطاري...أمس قناة الوطن محتفلة بالكريسماس وهذا شي حلو
بس ما سمعنا من كتاب جريدة الوطن من أمثال الطبطبائي والفهد أي اعتراض
وهم ما سمعنا من مقدمي برامج القناة من أمثال النهام ونبيل العوضي أي اعتراض
والا الحين صار تهنئة غير المسلمين حلال لأنها من قناة وجريدة
علي الخليفة
23 comments:
ويتل سيفه البتار من غمده و يركب الحصان الاسود و يركض درقن درقن درقن ...
هالسيف ماكو منه إلا اثنين عند شمشون الجبار و عند هالوزارة الخرطية
: )
سدرة
وزارة بالطو مرعوب
فتى الجبل
و الكبت يولد الانفجار و عمك اصمخ حسبي الله عليهم و على الي سلطهم علينا :(
دمت بخير
بس
اي والله
أنا بإنتظار مؤتمر الوسطية الجديد في جزر الواق واق
فأنا لا أدري ما موقف عصام البشير الوسطي من قضية التعايش مع باقي البشر
حلم
اهما بالسودان ماعرفوا يتعايشون مع مسيحيينهم
تبيهم يتعايشون مع بقية الأجناس
عيدك مباك فتى الجبل ولو انها متأخره
اذا ماتدري شيصير بهل حفلات .. انا اقولك
على الاقل تكون المسخره مو رسميه .. وتصير ديرتنا سبه مثل البحرين
لو اقول حق واحد بروح روسيا يقولي ترجع بالسلامه
بس لو اقوله رايح البحرين . يقوووولي.. هاااااااااا اشعندك؟
وكل هل سمعه البايخه لسكوت حكومتهم ورعايتها للفساد
تحياتي
وتره امس كاتب سالم الطويل في الوطن عن تهنئة المسيحيين
بس شكله رئيس التحرير مايقرا الجريدة
كويتي
أيامك سعيدة
الحفلات بالكويت مو نفس البحرين
فيها ضوابط وقوانين
عشان جذي آنا ضربت المثل بحفلات هلا فبراير كانت وايد وايد وايد راقية ولا فيها تجاوزات تذكر
كل عام والمسلمين بخير للاضحى
وميري كريسمس للمسلمين والمسيحين ولا سيدنا عيسى بس لهم
ميري كريسماس اول شي
صح لسانك
وبعدين تكفه قولي انت ساحر يااخي مايصير الي افكر فيه تكتبه ينخاف منك والله :)
منع الحفلات خطوة مهمة نحو تحقيق دولة كويتستان
شالحل يعني
نسوي حفلات هني
يقولك كل ممنوع مرغوب
والحين جدام الناس ومن وراهم كل شي صار علني يعني الاحتفالات صارت عيني عينك بخرابها وبسنعها
على العموم
اتمنالك سنه سعيده يارب وكلها خير ان شاءالله
وخلنا نسوى حفله عندي بالبلوق وتطمن التكاليف كلها عليك مو علي شقلت
سعود
وانت بخير
آسف
ميري كريسماس للكل
مهندس
مو ساحر
بس القلوب شواهد
حمد
أوووووووووووووووف
زهقونا
سيليزيا
كل واحد يسويله حفلة بالبيت مع الأهل
شيماء
مشكورة
كريمة
واحنا نستاهل
المشكله مو بس وزارة بالطو مرعوب الا حكومةام هارون وانت الصاج....اهم مو قصدهم يكبتون المواطن....اهم يوفرون الدعم للتجار الشرعيين فتلقا اهل البرائه يا بالمجمعات والكافيهات او بالمطاعم الي حتى برائتها اختفت ولأهل الوناسه اهم يخلونك تتجه للمخيمات والشقق من اجارات وبيع مستلزمات الى التجار الغير شرعين الممولين لاحتياج هذي السهرات...وتوابعها
أأأخ بس شتقوووول شوف الكويت قبل ايام الحفلات الي تصير وحتى السمرات كانت تتسوى بمسارح السينمات كالاندلس والفردوس وكان اهل الطرب يتعنون لي الكويت عشان يلتقون بفيروز وام كلثوم وعبدالحليم وحتى اهل العدنيات يلاقونلهم مكان :)الكل مرتاح ومستانس والي يبي يخورها رسميا بيخورها بالخفاء...بس الحين انعكست الدنيالا انشطه ترفيهيه ولا حفلات و تعال عطلة اخر الاسبوع بالمخيمات والشاليها تشوف الي يخلي شعر جنبك يكش ومن تظلم الدنيا ماتلحق تسمع اي ديجي ومن اي صوب الكل مشعللها...والبنات(( اهلين وولك وأخواتها مو بناتنا))صاروا بالبانشيات يحدون
الشباب ولا عزاء لمخيمات العوايل الي حاليا صاروا امام خيارين مالهم ثالث اما التأقلم مع الاوضاع بالبر الجنوبي...او التمشور الى البر الشمالي
وحتى المسنات سكروها <----محتر من هالسالفه ههههه
الفنطاس
اي والله صاج ياخوي
وليش تروح بعيد
والله حفلات هلا فبراير وآنا رحت لها كذا سنة والله ما فيها الا كل خير والناس محترمين نفسهم
والله ياخوى دودهونا وعفسونا عفاس
اخلطوا علينا الحلال والحرام والصح والغلط والحسن والضعيف
فوق تحت وقمنا نتخبط....ومنها التزمنا الصمت خوفا من الوقوع بالخطاء
او المحرم......من هنا بدوا باستغلال صمتنا وضعفنا....وداسوا ببطونا
بس الحين ننطر نتاج الوسطيه ونشوف التغير اللى بتسويه بافكارهم المتزمته
والله كريم
أممممم أولاً أذكرك بحديث الرسول صلى الله عليه وسلم : (لتتبعن سنن من كان قبلكم حذو القذة بالقذة حتى ولو دخلوا جحر ضب لدخلتموه قالوا: اليهود والنصارى؟
قال: « فمن!! ». )
وثانياً الحفلات والمهزله التي تحدث في هذا الوقت بالذات لا تفرح ولا شيء كلها فساد بفساد والله مو وناسه لأن إن كان الشيء يغضب الله فلا أعتقد فيه وناسه فتخيل لو الشخص قاعد بإحدى هالحفلات وشرب ومسخره وعاهرات وزنا وكل الكبائر ولا تقول إنه لا يوجد هالشيء لأن هذا الشيء واضح لدى المخافر التي تمتلأ في هذه الأيام
هدانا الله وإياك لكل خير أخووي :)
نقطه أخرى
هل تريد أن ننشر الزنا في الكويت أكثر؟
هل تريد أن ينتشر الخمر أكثر وأكثر؟
هل تريد الفساد يعم بالزياده أم تريد الإصلاح للكويت وللشعب ومن يريد أن يسرسر على مزاجه فليذهب لخارج الكويت
Post a Comment