Wednesday, September 24, 2008

الوداع

دخلت عالم التدوين بهدف التعرف على اصدقاء لا بقصد كسب العداوات
اليوم وبعد ما حصل بين بعض اخواني وخواتي المدونين والمدونات من تراشق بالسب والشتم
ولأني حريص على عدم فقدان اي واحد منهم لأن الكل يعز علي حتى لو اختلفت معاه بالراي
ولحرصي على عدم كسب العداوات
انسحب من الساحة التدوينية
لأني كنت ابيها ساحة خير مو شر
ساحة زهور مو شوك
ساحة بناء للوطن مو لهدمه
متمنيا لكل المدونين والمدونات النجاح والتوفيق
والله الهادي
والى اللقاء
في اي مجال لخدمة الوطن وابنائه

Monday, August 4, 2008

صيف صيف صيف صيف

آنا باجازة
ومن كثر وناستي بهالاجازة نسيت اقول لكم
العذر والسموحة منكم
راجع لكم آخر الشهر ان شاء الله
_________________
أتمنى من كل ما فيني عودة
الأخ حسين الفضالة
الكويتي المعتقل بالسجون الايرانية
والمنسي تماما من قبل الحكومة الكويتية
ونواب مجلس الغبرة

Sunday, July 27, 2008

منوعات

يقولون ان اكو مشروع يديد راح تقدمه لجنة استكمال تطبيق الشريعة يقترح منع تدريس الفلسفة لطلبة الثانوية
مع ان الفلسفة تهتم بالتفكير والتنظير ومصادر التشريع الاسلامي من بينها الاجتهاد اللي يعني فيما يعني استخدام العقل
لكن لجنتنا الحلوة الظاهر ما تبي العقل والتفكير مثل حكومتنا واخذ يا حفظ واخذ يا تلقن بدون اي فهم
والظاهر انهم يشتغلون على مبدأ حسينوه اللي يقول
لا تحجى الشرع الكل ياكل تبن
____________________
رئيس حكومتنا رايح بجولة آسيوية عشان استكمال خطوات تحويل الكويت لمركز مالي وتجاري
هالمركز اللي صار مثل بيض الصعو نسمع فيه وما نشوفه
زييييييييييييييييييييييييييييييييييييييييييين
اليابان وبروناي وتايلاند اكو منهم فايدة وممكن نتعلم منهم
بس بورما وكمبوديا ولاوس شنو بنستفيد منهم حق مركزنا المالي والتجاري؟
____________________
غسل الادمغة
بغياب الحكومة

Monday, July 21, 2008

تشريعات تسهيل البوق

مدام حكومتنا ومجلسنا مشغولين بتضييق وتقييد الحريات الشخصية
اشلون ما تصير جذي قوانيننا
ومدام هذا اهوا مجلس امتنا وهذي اهيا حكومتنا
اشلون عيل ما يعتفس حالنا وما تضيع فلوسنا

Tuesday, July 15, 2008

حيرة مواطن

ليش محكوم على العرب انهم يعيشون بديمقراطية شكلية وبدون تنمية مثل ماهو حاصل بالكويت ولبنان؟
او
انهم يعيشون بتنمية وتطور بس بدون ديمقراطية مثل ماهو حاصل بالامارات وقطر
او
انهم ما يحصلون لا ديمقراطية ولا تنمية مثل ماهو حاصل ببقية الدول العربية اللي تستأثر فيها الطبقات الحاكمة وفداويتهم وبس على معظم دخل الدولة
هل هالشي قدر مكتوب علينا؟
هل هالتخلف طبع نتطبع فيه من المهد لي اللحد؟
هل يصعب علينا ان احنا نقتدي بالدول اللي تحترم شعوبها ودساتيرها؟
وهل راح يستمر هالوضع الى مالانهاية؟

Sunday, July 13, 2008

طلب هايف من مستر هايف

الشوارع فيها مغازل
عيل كسروها
المجمعات فيها مغازل
عيل هدموها
التيلفون والموبايل والانترنت يغازلون فيهم
عيل منعوهم
الحمام الزاجل من الممكن المغازلجية يوصلون رسايلهم من خلاله
عيل ذبحوه
الكويت فيها مغازل
عيل حرقوها
يا هايف يا بو الاقتراح الهايف
كل شي بهالدنيا سلاح ذو حدين
وبالتالي ما يصير نمنع كل شي بس لأن اكو ناس استخدموه غلط
ما يصير نمنع الناس من حرياتهم بس لأن جم واحد استخدموها خطأ

Thursday, July 10, 2008

مركزنا المالي والتجاري

بحمدالله وفضله انطلقت ورشة تحويل الكويت لمركز مالي وتجاري ينافس اكبر المراكز المالية والتجارية بالمنطقة
علما ان نقطة الانطلاق الفعلية سوف تكون في هذا الصيف الذي سيشهد بروز الكويت كمنافس لسنغافورة ودبي
ونخليكم الحين مع شرح لمراحل عمل الورشة الخاصة بهالشي

Wednesday, July 9, 2008

لا تعليق

لاتعليـــــــــــــــــــــــــــــــــــــــــــــــق
بس عندي سؤال
بما ان المجلس البلدي اهوا المعني بالمخطط الهيكلي للدولة وما يشتمل عليه من تطوير للمناطق الصناعية والاستثمارية والتجارية وتنمية الدولة...فهل راح تؤدي السيارات اليابانية الكشخة (اكيد لكزس ماكو غيرها ياباني كشخة) او الالمانية وزيادة السكرتارية لتبدل مخ الاعضاء المصين اللي عطل مشروع الدائري الاول بسبة مقهى للشيشة والمشغول بتثمين بيوت المعزبين الناخبين وذلك لمناقشة مشاريع تنمية الديرة؟

Sunday, July 6, 2008

من وين والا وين؟

ما ندري من وين نحصلها؟
من الحكومة الردية والا المجلس الاردى؟
من الحكومة المربوطة والا من المجلس المفتلت؟
وبالنهاية
الاثنين يبون يقمتونا...الحكومة سياسيا والمجلس شخصيا
والخوف انهم يكونون متفقين على هالشي
الحكومة تتحجى عن مظاهر سلبية بالحرية السياسية

والمجلس يتحجى عن مظاهر سلبية بالحرية الشخصية
والمشكلة ان هالكلمتين مطاطيتين وكل واحد يقدر يفسرهم على مزاجه وكيفه
وبين حانا ومانا ضاعت حقوقنا احنا
وابسط مثال على هالشي التعليم المشترك اللي تم منعه بالجامعات الحكومية...ليش؟
لأن تفكيرهم دايما محصور بالمنطقة ما تحت السرة وما بين الفخذين
زين انتوا تفكيركم دايما جنسي اوكي بودي عيالي مدارس خاصة مشتركة وبدفع لها من حر مالي
لأ...هم بنمنعه كيفنا وانت طق راسك باكبر طوفة

Wednesday, July 2, 2008

أسد علي ومع الغير صخلة

لما شفت ردة فعل حكومتنا الرشيدة ووزير خارجيتها العتيد على الاتهامات الامريكية للاموال المدفوعة من قبل جمعية احياء التراث والاتهامات الموجهة لها بانها تمول الارهاب تمنيت حزتها شيين
الاول
ان حكومتنا تقوم بدراسة متأنية لهذي الاتهامات اللي من الممكن انها تكون صحيحة مثل ما انها من الممكن تكون خاطئة
اما الرد بدون تكبد مشقة دراسة هالاتهامات فهذا الشي ما يسويه الا الانسان الخبل...ليش؟
لأن شيسوى باجر على الحكومة لو طلعت هالاتهامات صحيحة...وقتها راح يوجه الاتهام هالمرة حق الحكومة نفسها اللي دافعت عن هالاتهامات
الثاني
لما شفت العصبية والسرعة الحكومية بالرد على الاتهامات الامريكية تمنيت ان حكومتنا ما تكون أسد على أمريكا وعلى الغير صخلة
وين عصبية الحكومة على الشقيقة السعودية اللي اجبرتنا على تغيير موقع المصفاة اليديدة مع انها على اراضينا؟
وين عصبية الحكومة اللي ترضى ان العلم السعودي يرفع على ارض الكويت وفي منشآت تكساكو وعلى ارض كويتية؟
يعني السعودية ترضى نرفع العلم الكويتي على المنشآت النفطية المشتركة بالخفجي؟
وين عصبية الحكومة على ايران اللي كل يوم تدش مياهنا الاقليمية؟
وين عصبية الحكومة على ايران اللي مو مخليتنا نستفيد من الغاز والنفط في مياهنا الاقليمية بحجة الجرف القاري؟
وين عصبيتنا على العراق اللي للحين ما تعاون بارجاع جثث شهدائنا؟
وين عصبيتنا على العراق اللي للحين مو راضي يرجع لنا املاكنا المنهوبة ايام الغزو؟
والا العصبية ما تطلع يعني الا على امريكا؟
وخلنا نتذكر ان تحريرنا ما كان الا بمشيئة الله ثم المارد الامريكي الشيطاني
وخلنا نتذكر ان الامريكان لما بغوا يؤجرون بوبيان منا ويدفعون لنا فلوس مقابلها شنو سوى رفضنا حق هالشي وقتها
وخلنا نتذكر ان اذا كانت حكومتنا صخلة مع ايران والسعودية والعراق
فالاولى انها تكون نملة مع المارد الامريكي
او انها تستأسد على الكل ومو على ناس وناس
يواش يواش يا حكومتنا...والعقل تراه نعمة والثقل حكمة
___________
الدولة السلفية العظمى
عادي...قوانين دولة الكويت غير معترف فيها عندهم
اهما يعترفون بدولة جمعية احياء التراث المتأسلم وبس

Tuesday, July 1, 2008

منوعات من ديرتي

سجون وزارة التعليم الواطي
عفوا قصدت التعليم العالي
مع العلم ان بعض الطالبات تعدوا سن الواحد والعشرين
يعني يحق لهم الانتخاب بالكويتي الفصيح
فهل يجوز التعامل معاهم بهالطريقة الموآدمية
__________
مقابرنا...عفوا مستشفياتنا
وراح تبقى مستشفياتنا على هالحال طالما الدولة تهدر اموالها على ناس اقترضوا برضاهم وما يبون يسددون هم برضاهم
والسؤال اهوا
وين صوت الطبطبائي اللي كان ملعلع على الصحة؟
تقدر على الوزير القبلي المحمي من قبيلته يا الطبطبائي؟
__________
تعلموا يا اهل الكويت الكفرة الفجرة كيف تتلذذون بصلاتكم
تعلموا يا اهل الكويت الفسقة كيف تتلذون بصلاتكم
زيييييين....تبون تتعلمون اشلون تتلذذون بالصلاة وجنكم منتوا مسلمين كيفكم
بس الاولى ياعرب ويا اهل الاسلام انكم تتعلمون الاخلاق الاسلامية
والاخلاق الاسلامية ما تقول ان الواحد يصك الطريج ويضيج على خلق الله اللي بيعبرون عشان ندوة
واكو شي اسمه مواقف يوقف فيها الانسان ولا يضيج على البشر
وفي الحديث النبوي ما معناه
ياتي الرجل يوم القيامة وقد صلى وصام وزكى......الخ ولكنه يدخل النار
لماذا يا رسول الله؟
لأنه سب هذا وظلم هذا.....الخ
فنرجو تعليم المسلمين كيفية احترام الآخر لأنهم شاطرين وايد بالصلاة بس حدهم فاشلين باحترام الآخرين
__________
كهربا...ياكهربا
منو اللي راح يحاسب وزير الكهرباء القبلي الاخونجي عن انقطاع التيار الكهربائي؟
ومنو اللي راح يحاسب حملة ترشيد الاخونجية اللي مبين انها وايد انجحت بترشيد الكهرباء؟
علما ان وايد من العقارات التجارية والاستثمارية بالاضافة لبعض المصانع تتعطل بسبب عدم ايصال التيار لها
__________
مجلس الامة التشريعي التنفيذي القضائي
زين اشدراكم ان الحالات المرضية بس 50 حالة؟
واي مركز دراسات اهوا اللي توصل حق هالعدد؟
وبالمناسبة ومع وجود مجلس امة بتاع كله شنو حاجتنا عيل حق الحكومة والقضاء؟
__________
همسة
لكل من يعتقد ان الدستور اهوا مجلس امة وبس
لكل من يعتقد ان الديمقراطية اهيا عملية ترشيح وانتخاب فقط
نقول
ترى حتى زيمبابوي اللي يحكمها دكتاتور اسمه موغابي عندهم دستور وانتخاب وترشيح...لكنه بالشكل وبس
الدستور بحر والمجلس شاطئ صغير من شواطئه
الدستور فيه اللي اهم من المجلس
فيه حرية التفكير والاعتقاد والراي
فيه العدل والمساواة
والسؤال الحين
اذا المجلس شرع قوانين تحد من الحريات هل يعني السكوت عن هالتشريعات لأنها صادرة من مجلس امة؟
لا والف لا ما نسكت لأن الدستور اهم من المجلس والحريات والعدل والمساواة اهم من المجلس
كان عندنا حكومة تحد من الحريات ووقفنا بويهها
وصار عندنا مجلس ينافس الحكومة بالحد من الحريات وهم راح نوقف بويهه

Monday, June 30, 2008

وين العدالة

وين العدالة بزيادة الخمسين اللي يت حق ناس وانمنعت عن ناس علما ان الاسعار قاعدة ترتفع على كل الناس؟
اما كان الاولى زيادة الدعم للاحتياجات الاساسية وبهالشكل نحقق العدالة بحيث يستفيد الكل من الدعم لهذي المواد وبنفس الوقت ما نزيد عرض النقد بالسوق ونسيطر نوعا ما على التضخم؟
ووين العدالة بصندوق المعسرين؟
ومنو اللي جبر الناس ياخذون القروض؟
وشنو ذنب اللي ماقترض؟
وشنو ذنب اللي اقترض وقاعد يسدد بانتظام خوفا من ربه وحفاظا على سمعته؟
ليش صار المحترم بالكويت ينداس والعوي يحطونه على الراس؟
يا السلف والاخوان ولجنة الظواهر السلبية من متى صار شراء الفوائد البنكية حلال مو حرام؟
وبهالخمسمية مليون جم بيت ممكن نبني حق اللي شاقهم الايجار شق؟
جم مستشفى ممكن نعمر؟
جم مدرسة نبني؟
والمصيبة العودة اهيا هذي
الناس يوظفون مستشارين اقتصاديين وقانونيين وفنيين....الخ
وحبايب مجلس الامة يهدرون المال العام على 750 سكرتير او مفتاح انتخابي بالتوصيف الاصح لمكافأتهم من مخابي الدولة وعلى حساب اموال الشعب....ويقولون المجلس معظمه اسلاميين....اطلعت هذي اهيا العدالة الاسلامية مالتهم...والله الاسلام بصوب واهما بصوب ثاني
ملاحظة أخيرة
نتمنى ان تقوم لجنة الظواهر السلبية بتشريع قانون يلزم مراكز التسوق الغذائية بيع الدياي بالريش لأن منظر صدور وأفخاذ الدياي يخدش حياء بناتنا وأولادنا ويزيد الشهوات الجنسية عندهم...لذا كان هذا الطلب من اللجنة الدخيلة على هذي الارض وهذا الشعب

Monday, June 23, 2008

تساؤلات + معادلة كويتية + نكتة حق اللي اذبحوني ويبون نكتة

التساؤل الاول
مو مني...من الاخت سعاد الحمد لتلميذ بن لادن والمجاهد الركن وليد الطبطبائي

التساؤل الثاني
هذا عاد مني حق السلفي العظيم خالد السلطان
تدعو للاقتداء بالسلف الصالح يزاك الله خير من صوب
لكن ليش من صوب ثاني شركة الامتياز اللي انت رئيس مجلس ادارتها توجه معظم استثمارتها لدولة قطر وباراضي حكومية علما ان نفس هذي الحكومة تبيح بيع الخمور يزاك الله خير؟
هل لأن الحكومة القطرية تقتدي بهدي السلف الصالح يزاك الله خير؟
كما ان للشركة استثمارات بمصر اللي حكومتها تبيح الخمور والكازينوهات والمراقص الليلية...فهل هذا حلال يزاك الله خير؟
زين ليش ما تستثمر بالمدينة المنورة ومكة المكرمة وابها يزاك الله خير؟
مادري يمكن السلف الصالح قالوا جذي...الله يعلم
__________
معادلة كويتية قح
بوق+نصب+تقييد حريات+واسطات+رشاوي+كسر القانون=نهاية دولة اسمها الكويت
__________
للي يقولون عني نكدي ومتشائم ويبوني اضحك واضحكهم بقولهم هالنكتة اللي وصلتني بمسج
تراهي نكتة لا تروحون لي بعيد...يعني مو تفضحونا تراهي كلش ما تنبطق على واقع حياتنا
كان يا ما كان في قديم الزمان
كان اكو ريال يبي يشتري شاذي
جان اييب له البايع 3 شواذي
الاول سعره اب 500 دولار
الله ليش؟
لأنه يعرف كمبيوتر
زين والثاني
اب 1000 دولار
الله ليش؟
لأنه يعرف كمبيوتر ويصلحه لي اخترب
زيييييييييييييييييين والثالث
اب 4000 دولار
اللللللللللللللللللللللللللللللللللللله ليييييييييييييييييييييييييييش؟
البايع: بصراحة مادري بالضبط اهوا شيسوي
ولا عمري شفته يسوي شي
بس بقية الشواذي ينادونه يا طويل العمر

Thursday, June 19, 2008

التنمية هل هلالها

مبروك لاهل الكويت...مبروك يا اهل الديرة
التنمية هل هلالها...ومشاريع تحويل الكويت لمركز مالي وتجاري بلشت
اولا
مشروع محاربة جميع المؤسسات المالية التقليدية لصالح مؤسسات التمصلح على حساب الدين
ززززززززززززززززين
ابي افهم شي
ليش المؤسسات المالية المتمصلحة على حساب الدين تحط اموالها بمصارف امريكية وغربية غالبا ما يسيطر عليها اليهود والنصارى يزاكم الله الف خير؟
اساسا ليش البنوك المتمصلحة على حساب الدين تفتح حسابات بالبنوك التقليدية داخل الكويت؟
يعني هالشي ما يعتبر مساهمة في نماء الدول الغربية اللي تتعامل بالربا على قولتهم
ما يعتبر هالشي مساهمة في تمويل مشاريع قد يدخل فيها الخمر والميسر والدعارة يزاكم الله خير
علما ان معظم هذي الحسابات جارية يعني تكلفتها على البنوك الغربية صفر وبالتالي تقوم البنوك الغربية باستخدام هالاموال في تمويل مشاريع عديدة ببلدانهم وطبيعي يكون من بينها مشاريع غير اسلامية لا ويمكن محرمة شرعا يزاكم الله خير

ثانيا
مشروع اهمال المصدر الوحيد للدخل بالكويت الا واهوا النفط لصالح لجان التدخل في شئون خلق الله
زززززززززززززززين
سؤالي للاعضاء المتاسلمين في مجلس الامة
الا يعتبر مجلسكم المختلط ظاهرة سلبية على الاساس المعتقدي لكم يزاكم الله الف الف خير؟
اذا اي فالمفروض انكم ما تشاركون بالجلسات
واذا لأ فالمفروض انكم تسقطون قانون منع الاختلاط يزاكم الله خير
وسلم لي على الدين اللي على المزاج

Tuesday, June 17, 2008

كويت المستقبل

هذا اهوا حال الديرة المتوقع مع لجنة الظواهر السلبية
وهذي اهيا دولة الكويت الطالبانية مع استمرار هاللجنة
مع الشكر لضحوك البنوان

Sunday, June 15, 2008

معسكرات التأسلم الصيفية والرعاية الحكومية

من يوم مانقطعت نشاطات الاندية الصيفية اللي كانت تترس فراغ الشباب اثناء العطلة الصيفية باشياء هادفة يقدرون من خلالها تنمية وتطوير قدراتهم العلمية وصقل مواهبهم اللي يتميزون فيها...من ذاك اليوم اطلعت لنا معسكرات تيارات التاسلم الصيفية اللي تقوم باذكاء وانماء المواهب العنصرية والطائفية لمرتاديها على مبدأ هذا شيعي وهذا سني ولمشاركة الاخوان المجاهدين في افغانستان والعراق بجهادهم ضد الكفرة الفسقة ومادري ليش ما يدزونهم اسرائيل بس الظاهر بينهم وبينها معاهدة صلح والنتيجة اهيا العبث الطائفي القبلي الفئوي اللي قاعدين نشوفه بالديرة وعدم تقبل الراي الآخر والانغلاق الفكري والغاء الدولة المدنية لصالح دولة كل من يقدر يفتي خل يفتي


واللي يبط الجبد ان الدولة تحتضن مؤسساتهم المالية وتقدم لها كل الرعاية مقابل اهمال بقية المؤسسات المالية اللي لها تاريخ عريق بالدولة علما ان فوائد مؤسسات التاسلم المالية اعلى من التقليدية ومشاكلها مع المقترضين اكبر

طبعا اسميها فوائد مو ارباح لأن للاسف النظرية الاسلامية المالية غير مطبقة بالشكل السليم فعليا


__________________________________

في الختام

رسالة موجهة الى

احمد فهد الاحمد

رئيس جهاز الامن الوطني اللي ماله شغل

رئيس اللجنة الاولمبية الآسيوية

رئيس الاتحاد الآسيوي لكرة اليد

الراعي الرسمي لمسابقات مزاين الابل

الراعي الرسمي لمسابقات قلطات قناة العفن

رجل كل المناصب...الرجل السوبر مان...الرجل بتاع كله

تكفة...تكفة...تكفة

اني اسألك انت واخوك وفداويتكم الرحيلا على قولة القايل

وفكوا رياضتنا من عقلياتكم وشروركم وبلاويكم

Wednesday, June 11, 2008

برافووووووووو



.
مجرد سؤال حق ناصر الصانع وضيف الله بورمية

مادامكم وافقتوا على قانون منع الاختلاط عيل اشحقة رازين عمركم بالصورة وواقفين يم الوزيرة الحمود يزاكم الله خير؟

يعني ما تعرفون توقفون بالصوب الثاني يزاكم الله خير؟

___________________________________

احلى تحية نوجهها للمحامي بسام العسعوسي وزملائه المحامين اللي انتفضوا لحماية الحريات المكفولة دستوريا

ونقول لهم كفيتوا ووفيتوا والله يوفجكم لما فيه صالح هالديرة ودستورها وقانونها ودولة مؤسساتها المدنية

وان شاء الله احنا بنوقف معاكم بمسعاكم ونتمنى ان القوى الديمقراطية تقتدي فيكم وتصحى من سباتها وتدافع معاكم عن هالحريات
وبرافو على هالتحرك اللي ان شاء الله يكون جاد

Monday, June 9, 2008

وتزداد المخاوف على الحريات المكفولة دستوريا

اليوم...وعقب الزحف المنظم من قبل المتاسلمين لوأد الحريات المكفولة دستوريا وقانونيا بدولة المؤسسات
نناشد جميع القوى الديمقراطية والمدافعة عن الحريات لتنسى خلافاتها الهامشية ولتتحد وتتفق على حماية هذي الحريات
نناشد ونطالب قوى نبيها خمس الشبابية اللي هزت الشارع للقيام بواجبها وحماية حرياتنا الدستورية اللي يبون سلبها
اليوم المتاسلمين صاروا يتعاملون معانا وجن احنا كفار قريش...كل شي حرام وكل شي ممنوع
وياخوفي باجر يمنعون السامري والصوت والزهيريات وغناوي البحر...ياخوفي باجر يمنعون الغناوي باعراسنا وافراحنا
والغريب انهم مامنعوا قلطات الشعر والعرضات على الاقل على قاعدة ( والشعراء يتبعهم الغاوون )... صدق الله العظيم
اليوم...وعقب خوف حتى الشيوخ منهم...اليوم...وعقب رغبة المتاسلمين الواضحة لتحويل الدولة المدنية لدولة طالبانية
نناشد ابونا ووالد الجميع صاحب السمو الشيخ صباح الاحمد امير البلاد لانقاذنا من زمرة متاسلمة كل همها القضاء على حرياتنا
نناشد والدنا وابوالكل سمو الشيخ صباح اللي بيوم من الايام قال انه واحفاده يستمتعون ببرنامج ستار اكاديمي تحريرنا من عقليات متحجرة
نناشد سموه عقب ما فلسنا من مناشدتنا لحكومة ضيعت حقوقنا الدستورية والقانونية وضيعت دولتنا...نناشد سموه عقب ما شفنا سكوت القوى الحرة عن مواجهة طوفان الانغلاق وتكفير المجتمع...نناشد سموه عقب غفلة القوى الوطنية للدفاع عن الحريات
نناشد سموه ارجاع دولة الكويت الدولة الدستورية القانونية المؤسساتية المدنية دولة الطيبة والسماحة دولة الفرح والمرح والسرور الهادف والبريئ
نناشد سموه لتحرير الديرة من جحافل تيارات الردة المتاسلمة
مالنا يا شيخنا ووالدنا غيرك بعد الله نشكي له من سوء الحال بديرتنا

Thursday, June 5, 2008

مستقبل الكويت

عقب ما كنا مثال للطيبة والسماحة
عقب ما كنا السباقين بكل مجال
عقب ما كنا اهل الفرح والمرح
عقب ما كنا منبع للطرب الاصيل
هذا اهوا مستقبلكم يا اهل الديرة مع الاحزاب المتاسلمة السنية والشيعية اللي قاعدة تلعب باسم الدين
هذا مستقبلكم يا اهل الكويت مع لجنة ظواهرهم السلبية اللي ياية بتربيكم لأنكم بنظرهم مو متربين
وبالتالي نتمنى من لجنة ظواهرهم الاتجاه لمعرفة ليش الكويتي فقد طيبته وسماحته بدل لا يترصدون حق الحريات الشخصية
لازم يشوفون ليش البوق والنهب انتشر بالديرة بدل لا يلاحقون كل من احتفل ببراءة وحسن نية
لازم يسالون تياراتهم ليش قاعدة بحضن حرامي الغزو ومستانسة بالتعاون مع جريدته وقناته بدل تكفير الناس
وسؤال لشيخ المجاهدين البذالي
يا اخي ليش ما تجاهد مع اشقائك المجاهدين اللي تدربهم لقتل الكفرة الفجرة؟
ليش قاعد بنعيم الكويت وتدز الشباب المغرر فيهم حق ويلات وجهيم الحروب؟
لا يكون بس انت معفي من الجهاد اللي انت تنصحهم فيه؟
واخيرا يا لجنة الظواهر السلبية
ما تعتقدون ان ظاهرة البذالي وخالد الدوسري ومحسن الفضلي تستحق الدراسة؟
هل من اخلاقيات اهل الكويت التدخل بمشاكل الدول الثانية؟
هل من اخلاقيات الكويتيين تكفير الناس؟
واللي اعتقده ان انتوا ولجنتكم دخلاء على اخلاقيات اهل الكويت وطيبتهم

Wednesday, June 4, 2008

بدينا والبادي اسم الله

الحمد والشكر لله
بدت تهل علينا اقتراحات القوانين الخاصة بمشاريع التنمية اللي راح تحول الديرة لمركز مالي وتجاري عالمي وراح تعيد فتح طرق الحرير التجارية القديمة اللي اشتهرت فيها المنطقة وكل هذا بفضل نواب مجلس خمتنا نواب الفزعة نواب نخيتك قال عطيتك...هذي بداية خير هالمجلس يا اهل الكويت ومبروك عليكم اختياراتكم السنعة اللي راح تعيشكم اليوم وتفقركم باجر
وبالطريج ان شاء الله مشاريع جدا جدا مهمة منها
اسقاط القروض
وزيادة يديدة للمعاشات
وتوزيع 1000 برميل نفط يوميا لكل مواطن
اما المشاريع الصحية والتعليمية والاسكانية والصناعية والانتاجية والتنموية والتجارية والاقتصادية والثقافية فهذي مو مهمة مع شعب آنا آكل اذا آنا موجود شعب كل همه يهدم الماضي ويعيش يومه وبس وينسى ان اكو شي اسمه المستقبل