Thursday, June 5, 2008

مستقبل الكويت

عقب ما كنا مثال للطيبة والسماحة
عقب ما كنا السباقين بكل مجال
عقب ما كنا اهل الفرح والمرح
عقب ما كنا منبع للطرب الاصيل
هذا اهوا مستقبلكم يا اهل الديرة مع الاحزاب المتاسلمة السنية والشيعية اللي قاعدة تلعب باسم الدين
هذا مستقبلكم يا اهل الكويت مع لجنة ظواهرهم السلبية اللي ياية بتربيكم لأنكم بنظرهم مو متربين
وبالتالي نتمنى من لجنة ظواهرهم الاتجاه لمعرفة ليش الكويتي فقد طيبته وسماحته بدل لا يترصدون حق الحريات الشخصية
لازم يشوفون ليش البوق والنهب انتشر بالديرة بدل لا يلاحقون كل من احتفل ببراءة وحسن نية
لازم يسالون تياراتهم ليش قاعدة بحضن حرامي الغزو ومستانسة بالتعاون مع جريدته وقناته بدل تكفير الناس
وسؤال لشيخ المجاهدين البذالي
يا اخي ليش ما تجاهد مع اشقائك المجاهدين اللي تدربهم لقتل الكفرة الفجرة؟
ليش قاعد بنعيم الكويت وتدز الشباب المغرر فيهم حق ويلات وجهيم الحروب؟
لا يكون بس انت معفي من الجهاد اللي انت تنصحهم فيه؟
واخيرا يا لجنة الظواهر السلبية
ما تعتقدون ان ظاهرة البذالي وخالد الدوسري ومحسن الفضلي تستحق الدراسة؟
هل من اخلاقيات اهل الكويت التدخل بمشاكل الدول الثانية؟
هل من اخلاقيات الكويتيين تكفير الناس؟
واللي اعتقده ان انتوا ولجنتكم دخلاء على اخلاقيات اهل الكويت وطيبتهم

42 comments:

فريج سعود said...

والله حطيت ايدك على الجرح
معفي من الجهاد هههههههه ليش فيه فلات فوت ؟
تصدق والله الصورة الي يمه اشرف منه لانها ما تقتل ولا تحارب باسم الدين وهو يقتل ويحارب الدين بفعله
وفوق هذا شوفتها ترد الروح
وشوفته تطلع الروح

Q8i Blogger said...

منو تقصد بلجنه ظواهرهم ؟
لجنه ظواهر الكويت صح ؟
لأني الي اعرفه الكل رفع ايده بالموافقه على تأسيس اللجنه
ومن بينهم صالح الملا .. بعدين تراجع عن رايه !!

فانت بكلامك هذا قاعد تخاطب الكويت كلها الله يهداك

واحنا معاك
البذالي دخيل على المجتمع ومحد قالك غير ذلك

وصادوه وراح ياخذ جزائه ان شاء الله

ويعطيك العافيه

صبا said...

صح اللسانك بكل شي قلته

وضربة علي الوتر يا خوي

موضوعك يحر
وصج قهر يودون اعيالنا يجاهدون ويقصون عليهم وهمه متكين بالبراد
ليش اهمه مايروحون ويموتون ويفكونه منهم
والي مؤيدهم خل يروح وياخذ اهله وياه يجاهد ّّ!!!!!
ويفكنا

why me said...

امبيه

والله الدنيا معكوسه

احس جني بنحول بتفكيري

wa6an-alnhar said...

لا تقلب المواجع يا نهاااااش
:(

Anonymous said...

كلامك فارغ مع احترامي لشخصك


وتحجج باسم الحريات الشخصيه

يعني مايصير حريه شخصيه الا لما نشوف الجنوس بالشارع



كلام ملينا منه
ونصه تأليف

حسافتج يا كويت said...

فتى الجبل

واللة كلامك صح بس ايتراوالي بعد المخرجات الاخيرة للمجلس

ببتدي ايمع فلوس واشتريلي شقة في ابو ظبي
ولا سويسرا او امريكا واعيش هناك

فقدت الامل بالاصلاح طالما الموجودون حالية من حكومة و مجلس كل يغني على ليلاة

someone_q8 said...

السلام عليكم
اخوي فتى الجبل , البذالي وربعه وربع جماعة التكفير اللي بالكويت منبوذين من كل التيارات الدينية ولا احد فيهم يدعمه سواء بالكلام ولا بالدعم المالي , فا لا انخلط الامور مع بعضها البعض واتعمم على كل التيارات انها مع البذالي وتفكيره , وبعدين اذا فيه على قولتك ييبلي تصريح من اي التيارات تدعم البذالي وربعة ولا تدعم جماعة التكفير ؟؟

نعم البذالي وربعه وجماعة التكفير اهم اللي خربوا البلد بأفكارهم وخلوا الشباب ارهابيين , وهالشيء محد ينكره ولا احد يحبه
خل انكون موضوعيين في الطرح ولا انعمم الغلط على ناس نختلف معاهم في الفكر


وبالنسبة للجنة الظواهر الدخيلة اعتقد انها تم الموافقه عليها بأغلبية المجلس ولا عشان اربع اعضاء غير موافقين عليها صار المجلس مو ديموقراطي وصار مجلس ماله طعم ؟؟؟
مو احنا دولة ديموقراطية ؟؟؟
خل نتحمل سلبياتها مثل ما نحب ايجابياتها , ماكو نظام كاااااامل اخوي الفتى , الا النظام اللي شرعه لك ربك
لك مني كل تحية واحترام :)

فتى الجبل said...

سعود
ومادري ليش يذكرني بابو لهب

فتى الجبل said...

كويت بلوغر
اخوي
لا تنسى ان مو كل اهل الكويت صوتولهم
ومن بينهم اخوك اللي قاعد يرد عليك
فازوا نعم
لكن ما يمثلون كل اهل
والملا اعترض عليها

فتى الجبل said...

صبا
هالاشكال تبي سلطة وفلوس وبس

فتى الجبل said...

واي مي
اي والله معكوسة
ومغبرة بعد

فتى الجبل said...

وطن النهار
والله والله والله
لو اكو شي يونس جان كتبته

فتى الجبل said...

آنو
وانت حجيك افرغ واسخف مع احترامي لشخصك
آنا ما ذكرت الجنوس
ولا دافعت عنهم وهالشي انت يبته من تاليفك يابو تاليف
مع العلم ان كرهي للشواذ من الجنسين ما يعطيني الحق بعقابهم ولكن يعطيني الحق بمعالجة المشكلة

فتى الجبل said...

حسافتج
والله حجيك عدل
بس المشكلة ان تفكيري مو بنفسي
تفكيري بالكويت وبس

فتى الجبل said...

someone
والله اني احترم نقدك انت وكويت بلوقر ليش؟
شوف اسلوبكم المحترم بالنقد وشوف اسلوب آنو للاسف الغير محترم واللي خلاني ارد عليه بمثل اسلوبه
اولا تقول ان البذالي وربعه محد وقف ممعاهم بالكويت من التيارات
نسيت الطبطبائي السلفي لما وقف وحيا المجاهدين بالعراق واهوا نائب مجلس الامة
يرضى باجر واحد عراقي والا سعودي يحارب الامريكان بالكويت؟
نسيت لما الطبطبائي السلفي وقف وقال شيخي وتاج راسي بن لادن اكبر تكفيري بهالدنيا
نسيت لما القطان الاخونجي دافع عن حامد العلي اللي يحط بسايته كيفية صنع القنابل
ثانيا آنا ما وقفت حق اعضاء مجلس الامة برشاش وذبحتهم لما اقروا لجنتهم
لكن من حقي الديمقراطي اني انتقد تصرفاتهم
والا تبونا بعد مانتحجى كلش؟

سدرة العشـــاق said...

كنا و كنا و كنا

بس تمقل بويوه نواب المجلس و تعرف ليش كنا و كنا

الشكوى لله

بس said...

الشكوى لله

شوف وجه العنز و أحلب لبن

طبعا أعضاء مجلسنا ألي أكثرهم
أسلاميين

someone_q8 said...

السلام عليكم
مشكور اخوي الفتى على تنبيهي للطبطبائي واحمد القطان لاني بصراحة نسيتهم , ولكن هم لهم كل الاحترام لا تنسى ماكو احد كامل
حبيب اخوي فتى

الحارث بن همّام said...

البذالي لا يمثل الاسلاميين .. يمثل نفسه بس

Suki_Candy said...

ياخوي نهاش حط من الحين لي الايام و السنوات اليايه ان ماكانت اهناك تفجيرات على عمليات ارهابية على هالمجلس الي اقدر اقوله من الحين مجلس فاشل مايحطون بالهم على شغلات تهم الديرة و المواطن لاحقين لي ستاراكاديمي ياعمي هالبرنامج اهم من المستشفيات اهم من التعليم؟؟

ولا حاطين دوبهم ودوب هالوزيرتين يعني شنو فيها اذا مرأة داخل المجلس انتو يامتأسلمين موتقولون المرأه اخت الرجال عفوا ولا حجيكم خرطي اب خرطي

والله من حره قلبي يانهاش انه اهم يعطون الشغلات الي مالها اهميه يكبرونها ولا فوق جذي اهم يربونا على اخر زمننا يانهاش يعني احنا ناس مو متربين لا اهلنا ولا احنا ويكفرونا بعد وصلت الدنيا جذي

نهاش مولاقيين واحد يسد حلوجهم و دام الحكومه مقويتهم وماتلاحظ في تناقض سمو البلاد سبق وتطرق الي تحويل الكويت الي مركز مالي وين المركز المالي ياالشيخ صباح دامك مخلي هالاشكال تحلل وتحرم على كيفها وين تبي ناس و اجانب اييون الكويت وهذول يطفشونهم؟؟ وتبي تحول الكويت مركز مالي ماعتقد ياشيخ صباح بوجود هالفئة من الناس الي تحلل قتل الناس وفوق جذي يمدون ايدينهم علينا لا والف لأ ومستحيل انه احنا نوصل لس هالمتسوى المنحط و اذا ماوقفهم الشيخ صباح الأحمد الكويت يا انها بتصير واحد من الاثنين يا تحت حق آل سعود الي بالسعودية او العراق الثانيه الي تكثر فيها الحروب و تفجيرات بين السنه والشيعه.

تحياتي يانهاش

Mok said...

أحسنت
:)

Mamloo7a Q8ia said...

راح نظل يا خوي كنا وكنا وكنا
ما دام هالمتأسلمين بيتحكمون فينا
وبيلعبون لمصالحهم باسم الدين
الله يحفظ الكويت يا رب

فتى الجبل said...

سدرة
الامل بالناس الطيبين ان شاء الله

فتى الجبل said...

بس
مو اسلاميين
متاسلمين

فتى الجبل said...

someone
صدقني والله ياخوي آنا ماعترض على اشخاصهم لأن كا عندي اي مشكلة معاهم
آنا مشكلتي مع افكارهم وبس

فتى الجبل said...

الحارث
صح
ما يمثل المسلمين
بس للاسف يمثل جماعته من المتاسلمين

فتى الجبل said...

سوكي
احنا ان شاء الله املنا كبير بابونا ووالد الكل الشيخ صباح والناس الطيبة معاه انهم يوقفون بويه هالاشكال
بس التغيير مايي بين يوم وليلة

فتى الجبل said...

موك
بعضا من ما عندكم

فتى الجبل said...

مملوحة
الله يستر

Kuwait said...

اهم ظاهره سلبيه عليهم معالجتها أولا هي :
مجلس اللا انجاز ..
وهي ظاهره انتشرت في الآونه الاخير كما انها مرفوضه من قبلنا نحن كشعب ..
شكرا لك والله يعطيك العافيه
تقبل مروري المتواضع ..
kuwait

عروس البحر said...

كل بلد فيها مشاكل من فساد ادارة و رشوة و خيانة و عدم تطبيق القوانين

Blog 3amty said...

هذيل مو مسلميين، هذيل متأسلمين خالي؟

أسم مو فعل !





Blog 3amty
Q8 Chili سابقاً

Mozart said...

فلنكن اصحاب مبادرة بدلا من مجرد ردة الفعل

ماذا نحن بفاعلون ؟

فتى الجبل said...

كويت
والله اهما نفسهم يبيلهم علاج
اشلون عيل بيعالجون الناس

فتى الجبل said...

عروس
صح
بس الناس ينقسمون حق قسمين
قسم يعالج هالفساد
وقسم نفسنا يزيد الفساد

فتى الجبل said...

بلوق عمتي
ومن قال اني اعتبرهم مسلمين
اهما متاسلمين

فتى الجبل said...

موزارت
وين شباب نبيها خمس؟
مو الاولى الحين يطلعون ويدافعون عن الحريات

blacklight said...

لا يوجد تيار سياسي ديني بلا اطماع واجنده إرهابيه .رغم الكوارث التي تحدث بالعراق ولبنان بسبب الأصوليه القمعيه نحن نأبى أن نتعلم ونتعظ.

فتى الجبل said...

بلاك لايت
للاسف
والخوف من حرب اهلية انها تصير بالكويت

Anonymous said...

والله وانت الصاج
واللجنه الدخيله خل تعالج اسلوبهم المتدني وهجومهم وتكفيرهم للغير
وخل تعدل نظرتهم للمراه اللي يشوفنها بنظره دونيه
وختعدل هالهايف اللي ما احترم النشيد الوطني
وخل تمنع النقاب اللي صار دخيل علينا عقب الغزو واللي ما ياب غير المشاكل وتستر المجرمين وتنكر الرجال لحضور اماكن نسائية كالعروس والصالونات


وانا اقول محد يحتاج هاللجنه الا المتاسلمين لان افعالهم صج دخيله على مجتمعنا الحر

فتى الجبل said...

آنو
كل يشوف نفسه بعين طبعه
واهما طبعهم الجنس وبس
فيشوفون الكل مثلهم