ترلللي

حكومة ما تعترف بالأحزاب وموراضية تقر قانون للأحزاب لكنها تتعامل مع كل الحركات والجمعيات السياسية واللي اهيا عمليا أحزاب ولا وتشركها بالوزارة وبعضها يمنح أراضي من الدولة

جذي حكومة شنسميها؟

نسميها حكومة ترلللي

حكومة تنشأ أجهزة مثل جهاز خدمة المواطن مو لشئ الا بهدف توظيف ناس من طينة هذا ولدنا..بعدين لما شافت ان الموظفين اللي فيه ما عندهم لا شغلة ولا مشغلة قررت تلغيه..بعدين الظاهر زعل (هذا ولدنا) جان تجس نبض الشارع والنواب انها تبي تستفيد من خبرة هذا الجهاز (الله والخبرة عاد..كلش مسكته) وتخليه جهاز لمتابعة تنفيذ قرارات الحكومة

انزين عيل الوزير و الوكيل والوكلاء المساعدين وجيوش الموظفين في الوزارات والهيئات الحكومية شسوون؟

ويتابعون تنفيذ قرارات منو؟ وديوان الخدمة والمحاسبة شنو وظيفتهم؟

لا يكون اهما اللي يخمون الشوارع

حكومة جذي تفكيرها شنسميها؟

نسميها حكومة ترلللي

حكومة تطبق القانون على ناس وناس وتقر قوانين وما تنفذها مثل قوانين الاصلاح الرياضي

جذي حكومة أوكي يسمونها اصلاحية؟

الجواب..لا غلط..هذي حكومة مو زغرت على قولة المارينا

هذي حكومة ترلللي

وبمناسبة العشر الأواخر ندعوا الله العلي القدير انه يغفر لنا ذنوبنا ويتقبل صالح أعمالنا ويرحمنا من حكومات الترلللي اللي عندنا