القوى السياسية...والمجتمع المدني

أجمعت القوى السياسية المجتمعة بديوان النصف على ضرورة احترام أسس المجتمع المدني لبناء الكويت الحديثة

كلام انشائي وايد وايد حلو

بس الكويت الحديثة المفروض انها انبنت من قبل 50 سنة من أول يوم تم فيه التصديق على دستور الدولة

يعني كان المفروض ان احنا نتحجى هالأيام عن اشلون نخلي الكويت دولة من مصاف الدول المتقدمة

عيل شنو اللي خلانا ليما اليوم نتحجى عن أسس الدولة الحديثة؟

السبب على ما أعتقد انه واضح

من أول يوم للدستور وعلى الرغم من ان مواده تحمي الكل (الدولة-الأسرة الحاكمة-الشعب) الا ان قوى الفساد ما عجبها هالدستور لأنه يضع القوانين اللي على أساسها تقوم الدولة المدنية وبالتالي تضيع مصالحهم الشخصية من استبداد بالسلطة ومن النهب المنظم لخيرات البلد

سووا كل شئ...تزويرانتخابات...رشوة انتخابية...حل غير دستوري للمجلس...ليما اوصلوا لتغيير الدوائر من 10 الى 25

الدوائر اللي قبلها كان يتعايش فيها السني مع أخوه الشيعي والحضري مع البدوي وكنا وصلنا لدمج فئات المجتمع مع بعضها

يابوا خلطة الدوائر اليديدة اللي مو بس فرقت الناس...لا وخلت المناطق دوائر مصكوكة على فئات بعينها

هذي منطقة تجار..وذيك منطقة شيعة..وثالثة حق قبيلة معينة...الخ

وانهدمت من يومها أسس المجتمع المدني وطلعت لنا الفئوية والقبلية والطائفية وانتشرت الواسطة والرشوة والفساد وقام المواطن يكسر القانون حتى وصلنا لوقت حتى الوافد فيه ما صار يحترم هذا القانون...حتى لما صار الغزو واتحدوا الناس لحد كبير ما حاولوا يستغلون هالشئ لاعادة الهيبة للدستور والقانون ودولة المؤسسات

اليوم اذا فعلا اهما جادين باعادة هذي الهيبة لازم يقضون على الأسباب اللي أدت الى زوالها

نحتاج اصلاح في كل المجالات..التعليم والتربية والاعلام والصحة والتنمية والتطوير والاقتصاد...الخ ومن أهمها التعديل السياسي بتعديل الدوائر لدائرة واحدة وهذي الأشياء يبيلها خبراء واختصاصيين ومستشارين...أما البيانات والحجي الانشائي فهذا شئ ماخوذ خيره لأن صار لنا سنين واحنا نسمع فيه وما نشوف نتائجه