سوق الحراي

أمس لفت انتباهي خبر القبس اللي يقول : (الحكومة تتريث بورقة الرواتب للمساومة مع الكتل)...والله خوش حكومة

يا جماعة الخير...وبغض النظر عن تأييدنا أو عدم تأييدنا لزيادة الرواتب...اللي آنا أعرفه وأفهمه ان أي حكومة وأي برلمان قبل اصدار أي قرار وفي أي شأن من شؤون الدولة تكون هناك دراسات وأبحاث من قبل اختصاصيين ومستشارين كل في مجاله حتى يتم اصدار قرار سليم وصائب يفيد في رقي ونماء وتطور الدولة

الا حكومتنا وبرلماننا العتيدين

الحكومة والبرلمان عندنا حولوا المجلس الى سوق حراي...يعني احنا ما عندنا وزراء ونواب...لا عندنا شريطية ودلالين

الحكومة ما تبي تدرس الموضوع...لا تبي تخليه مجال للمساومة لا أكثر ولا أقل

النواب ما يبون يعرفون هل القرار فيه مصلحة البلد والا لأ...لا اهما يبون يزايدون وبس

وبالتالي صار عندنا مجلس جم أقول وننصح الخرافي بدل ما يدرب شريطية الحكومة ودلالوة المجلس على التصويت الالكتروني خل يعطيهم دورات بسوق الحراي علشان يتعلمون أصول الدلالة

حكومة ومجلس بهالشكل احنا راح نضمن معاهم اصلاح أحوال البلد وتنميته وتطويره وأقول حق ليبراليينا من تحالف وطني ومنبر ديمقراطي وكتلة العمل الوطني خلكم نايمين وخلوا الحكومة والتيارات المتأسلمة وقوى الفساد يلعبون على راحتهم بالديرة ونتمنى انكم ما تنسون انه اذا فات الفوت ما ينفع الصوت يا غافلين

وفي الختام ماقول الا

عيدكم مبارك

ومن العايدين الفايزين