ألف مبروك للشعب الكويتي حكومة سلق البيض المعلن عنها
ألف مبروك لنا على حكومة الترقيع
ألف مبروك لنا على هالحكومة اللي ما تقدر تواجه أي استجواب وبالتالي تثبت على نفسها الادانة
وطبعا راح يقولون عطونا مجال ووقت علشان نشتغل مع ان معظم أعضاء الحكومة وزراء سابقين
واحنا نقول أوكي...موافقين وابنلحق العيار لباب الدار
بس عندي سؤال ومع كامل احترامي لأبناء الأسرة
معقولة من سنة الاستقلال ليما اليوم ما لقوا كويتي كفؤ لشغل منصب وزير الخارجية والداخلية والدفاع من خارج دائرة أبناء الأسرة؟
26 comments:
يبارك فيك يا خوي
ملينا واحنا نعطيهم وقت هذي تعتبر رابع تشكيله تقريبا في عهد ناصر المحمد
وصج مثل ماقلت وصل الوقت الي تستغني في الاسره عن بعض المناصب اذا صج مو لاقين احد كفو يشغلها
هذا يوصلك نوع من الاحساس ان ماكو ثقة بالشعب و بنفس الوقت اذا كانت المناصب حكر على الاسرة الحاكمة اظن انها من باب عينك على حلالك دوا
و الكويت اذا ممثلين شعبها قاعدين يلعبون فيها بالشئون الداخلية
اذا مسك الشعب الداخلية و الدفاع و الخارجية اظن عادى يبيعونا
على الاقل شيوخنا يدرون ان بدون الديرة ماكو شِيخة
q8i
الله يعين
براقش
والله أكو ناس زينين
بس هالنواب وصلوا عن طريق الرشوة والفرعيات وغيرها من الأساليب الملتوية اللي وايد من الزينين مايرضون يسوونها وعلشان جذي ينعزلون وطبعا هالأساليب الملتوية كانت بموافقة ومباركة الحكومة
اللي ينطبق عليها المثل اللي يقول خبز خبزتيه يالرفلة اكليه
لقوا شلون ما لقوا؟! لكن ما ينفع يعطون هالوزارتين للإعتبارات التالية
الخارجية: بما إنها عبارة عن تمثيل رسمي للدولة, فمن الضروري أن يتم تمثيلها من قبل أحد ابناء الأسرة كتدريب ميداني على القيادة وبنفس الوقت يتم تقديمه للمجتمع الدولي كرئيس وزراء قادم أو حتى حاكم الدولة المستقبلي
الداخلية: وزارة حساسة ومخاطر الإنقلاب السياسي و الإرهاب وغيره وإمكانية رصد بوادر هذه المخاطر تجعلها أكثر حساسية وليست مجرد جهة مسئولة عن المخالفات المرورية, فبالتالي شيء بديهي إن يمسكها إبن "بار" للأسرة وإلا...الأمور ممكن توصل لحرب أهلية ونفس الشي ينطبق على الدفاع-على حد علمي
هذا إعتقادي هو تفكير حكومتنا ووجهة نظرها والله أعلم...ننتقل للنشرة الجوية
و هذا سؤال يا نهاش؟
أهناك شخص في ذكاء ... و جاذبية ... و كاريزمية ... و حكمة ... و دهاء ... و فطنة ... ؟
أن وجدت هذا الشخص .. فعليك بخنقه على الفور
:)
يا فتى الجبل و البرارى و القفار
اذا الشرفاء ظلوا على انعزالهم راح ينقرضون
و لابد من ان الخير يظهر
حتى لو كان لازم يلعبون لعبتهم و يتفوقون عليهم
ما يصير لازم يبينون
نحتاجهم
الزين
بس ناصر المحمد ما مر على أي وزارة من الوزارات المذكورة وصار رئيس وزراء
حلم
لالالا ماكو ماكو
براقش
اشتغلوا مرة على الدوائر وافرضوا الصح...بس بعدين اختفوا وين راحوا مادري...يمكن قاعدين يزهبون تحرك يديد
الله يبارك فييك وعسا الله يهني سعيد بسعيده << شكووووو؟
المهم
لا شوف الشعب كله عندهم عيال فقارى ما يصلحون حق شي ولا عمرهم قارين وفاهمين ولا فيهم السنع والكفوو .. وطبعا هالشي بالنسبة لهمم
ولا ترا بالشعب ياكثررهم اللي ماكو احسن منهم وكفو وقد المسؤولية .. بس هذيل مايبونهم لان الدوله بهالحال راح ترتقي وانت عارف احنا رقي مانبي عاجبنا هالوضع وايد
اتمنى ان الاجابه وصلت ولو اني ماجاوبت بس كنت قاعده اتحلطم
احيانا اشك ان رئيس الوزراء هو من يريد حل المجلس بتشكيلاته
عزيزي فتى الجبل
ماعندهم لوزارات السياة الا عيال الاسرة واذا كلش كلش وزراء شعبيين فاسدين
تبي والا لا :)
تحياتي لك
بصراحه لا تعليق
لانه هالتشكيلات الوزاريه الي قاعد تصير يخلون الناس يشغلون بالهم ولا يقدرون يحلون مشاكل الناس الي تهم كم هالحدث السعيد و ياريت لو كل وزير يفكر قبل لا يقدم على اي شي و النواب الي ذابحينا استجواب لو يبطلون وزارة الداخليه الأميه الاستجوابات و بالله شنو استفادو من الاستجوابات والله لاعت جبدي من هالسوالف ترى والله في مشاكل تعاصر الموطان الكويتي اهم من الاستجوابات و تشكيل الوزاري الجديد
علينا بالعافيه و الله يستر من هالتشكيله الوزاريه " ماكنتوش" مو وزرا
تحياتي و احترامي للكل
فتى الجبل انت و مجموعتك ما تعتبرون نفسكم وطنيين
ما يضر لو استعنتوا فيهم و كملتوا المسير
ترى نبى من جيلنا
اظن تفهمون حاجاتنا و همومنا
صدقنى لو مو انا ضد فكرة ان المرأه تدش وزارة او مجلس جان صرت منهم
السالفة يبيلها اصرار و مداومه و دعم مادى و معنوى
و بكل واقعية انتوا الشباب اتصالكم السياسى اكثر و اقوى و احسن
ولو مالكم تأثير قوى جان ما صارت المدونات سلاح
بس اهم شئ تكون الكويت هدفكم
يايين بالدرب
سيليزيا
خوش تحلطم
فريج سعود
عندنا كل شي جايز
حمد
تصدق عاد لو يخلونا بدون حكومة جان يمكن الكويت تمشي وايد أحسن من اللي قاعد يصير الحين
مع إنّ الإستجوابات أغلبها الغرض منها تصفية حسابات وفرد عضلات ونتايجها ما منها فايدة وإذا وجد خلل لايوضع له حل، مع كل هذا، الحكومة إذا من صجها تريد الإصلاح يجب إن تواجه الاستجواب، فإذا كان الوزير معاه الحق فهذا سوف يثبت إن المجلس إما أن يكون غرضة من الاستجواب بدون منطق أو إنّه كان في شيئ غامض أو خافي على المجلس والوزير أظهر الحقيقة المنطقية
وإذا ما كان الوزير معاه الحق فالأولى له ان يلم أغراضة ويمشي
ولكن حكومة الإصلاح كأنها تقول لا تكشفون تصرفات الوزير الخاطئة ولأن إحنا نبيهم راح نعمل المستحيل على أن نبقيهم بالتشكيلة الوزارية واللّي ما نبيه مشكلتنا انحلّت وياه (ما ندّخله بالتشكيلة اليديدة)، وين صارت وزير عليه استجواب يقول عطوني وزارة النفط ويعرض عليهم أسامي ليختارون منها لوزارة المالية وينفّذ طلبه (هذا حسب كلام جريدة "الآن"الألكترونية) والحكومة مانفت
وعاشت شركت الكويت المقفلة وعاش الإصلاح اللّي ليلحين مغرّز والله يكون في عون الشعب ما دام الإصلاح مغرّز
سوكي
وليش يحلون مشاكل المواطن
لا ما يحلونها علشان يخلونا دايما بحاجة لهم
الله لا يحوجنا الا له سبحانه وتعالى
براقش
الله يسمع منج ويتحركون الشباب
مادري ليش مخلين القرعة ترعى
مطقوق
أخاف اللي قاعد تشوفه ياي بالدرب مجرد سراب
كويتي
أي اصلاح
لا يكون صدقت حجي رئيس الحكومة
ترى طلع بياع حجي وبس
ويلي ويلي ويلي اه ياويلي ويلي يا ويلي
بكيفي
ماقول الا الله يشافيك
حالتك صعبة
Post a Comment