اليوم بالذات تذكرت أغنية عبدالحليم حافظ اللي تقول
اني أتنفس تحت الماء
اني أغرق أغرق أغرق
اي تذكرتها لأن سفينتنا قاعدة تغرق...لأن ديرتنا قاعدة تنهدم...لأن كويتنا قاعدة تحتضر
أحس باليأس بداخلي...أحس فيه ياكلني
ما شفنا مشاريع فيلجا وبوبيان ولا راح نشوفها
ما شفنا مدينة الصبية ولا راح نشوفها
ما شفنا مدينة الحرير ولا راح نشوفها
ما شفنا جسر الصبية ولا راح نشوفه
مشروع دوار الجوازات اللي لازم يخلص من سنتين ما خلص وشكله بيقعد نفس مدة الدائري الأول
كل هذا يهون وممكن يتعوض...واللي ما بنيناه اليوم ممكن نبنيه باجر
بس اللي ما يهون اهوا السكوت عن اللي باقوا الديرة لما كانت تحت الغزو...لما كان عيالها بين شهيد وأسير ومشرد ومنهان داخل الديرة
لمصلحة منو تم اسقاط حكم المحكمة قبل تقريبا 10 سنين اللي أدان فيه علي بابا وشلة فداويته لمجرد نسيان التاريخ اللي يذيل فيه الحكم
وليش اليوم تحفظ القضية لعدم كفاية الأدلة
عيل الأدلة اللي كانت موجودة قبل 10 سنين وين راحت والا اهوا لعب يهال وبس
والعتب كل العتب على شرفاء هالديرة اللي ساكتين ومكبرين المخدة عن المسخرة اللي قاعدة تصير
العتب عليهم اللي قاعدين يخلون القرعة ترعى
وحسبنا الله وهو نعم الوكيل
ونعم المنتقم من الظالمين
39 comments:
باقي الشعب - مصدر السلطات جميعاً
مو بيدنا اختيار السلطة التنفيذية ولا القضائية
بيدنا كامل الحق في اختيار السلطة التشريعية
فلنحسن اختياراتنا
بعض أعضاء السلطة التشريعية ينجح ويتسلط بفضل الفلوس وكثير من الناس بحاجة للفلوس لسبب ضروري وغير ضروري وعادتاً اللّي يبي يحصل على مبتغاه يذهب إلى نقطة الضعف الموجودة بالغير والحكومة ساكتة تقول ما في أدلّة على الرشاوي والطاسة ضايعة والبلد من سيئ إلى أسوأ وما نحصّل إلاّ حجي وتصريحات واللّي نلمسة بالواقع هو إصرار على تفشي التدهور على جميع الأصعدة
إللّي شايفة أن الديرة صايرة كأنها مؤقتة، الغالبية تريد أن تحصل على اللّي تقدر عليه ولسان حالهم يقول "الله يعوّض على اللّي يحب ديرتة وخل يفيدة هذا الحب" صدقني يا فتى الجبل ساعات أقول جان زين ما نفط علشان كثير من الطمع يروح ويحل محلة الصفاء والتفاهم والبساطة مثل قبل ومثل ما كناّ نسمع عن الأيام السابقة ماقبل النفط
الله يكون في عون اللّي يشوف الفساد وما يقدر يسوي شيئ والأدهى من هذا، المفسد يتهمه بأنه ثرثار وصاحب مشاكل
بو بدر
الله يسمع منك وينتفض الشعب ويحسن خياراته
كويتي
العيب مو بالنفط والرخاء والرفاهية
الطمع يصير حتى مع الفقر
العيب في الأنفس اللي لوثها الزمن وانمحت الطيبة منها
صراحة ما فهمت...منو علي بابا وفداويته؟
سامحني إذا كان سؤالي ينم عن جهل لكن عزائي...جاهل ضائع في دروب العلم ولا خبير على طريق الجهالة
شي يحر الصراحه
الزين
علي الخليفة
عبدالفتاح البدر
حسن قبازرد
وأكو واحد أردني وانجليزي
بالاضافة الى اثنين من عيال الصباح
أعتقد أسماؤهم بدر ومحمد الصباح قاعدين في الباهاما
حمودي
ويموت قهر
وأبي أروح البحر
حسبنا الله و نعم الوكيل
أيداد بيداد
مطقوق
وين بروحون من ربك
النفط نعمة ولكن بفضل المصلحجية أصبح نقمة، أيام الستينات، مع أن كان في نفط، الأمان...إلخ كان أحسن من، الحين أكبر اهتمام بالدينار، ما يهم من وين نحصل عليه والمبادئ آخر ما يفكر فيها اللّي يسوي نفسه مثالي
السفينة صارت طشت
كويتي
وبالتالي انت قاعد تؤكد كلامي ان الأنفس اهيا اللي تغيرت بسبب الحرامية اللي قاعدة تحميهم الحكومة ليما كل واحد صار يتمنى انه يصير حرامي
حمد
الله يخليلنا حكومتنا الدايخة
رئيس الوزرا يبي المجلس يعطيه مهلة ثلاثة أشهر إلى سنة.اللي أشوفه انه يبي المجلس يصير مثل المجلس الوطني اللي ما طول اكثر من اسابيع وصار الغزو.
شكثر بيطول هالمجلس
والجواب الجملة المعهودة لكل حادث حديث
آه وإن كانت آه النساء تبني عروشا
قلناها وفي أيدينا نار وأغلال
آه وإن كنا في زماننا قروشا
قد باعونا ونسوا بأن الشهامة زينة الرجال
بيتان قد خرجا من جوف إمرأة لا تعلم ما قالت وما تقول
خلها على الله يا أخي وطن نايم وفي سكرة الفلوس هايم
الدنيا اليوم سودا
بس سؤال هذا حكم نهائي؟
خلاص يعني ما في مجال؟
محتار
أعتقد ان الوقت قد حان لمحاسبة رئيس الوزراء عن طريق استجوابه
اهوا أكبر تأزيم
سيدة نفسي
صح لسانج على هالأبيات
اي نهائي
بس باجي بوقة الاستثمارات واهيا الأكبر
بس ماعتقد انه راح يدان فيها حماية للي قاعد يغطي عليهم
الرد السابق
لانبريكابل غيرل
عزيزى فتي الجبل
القضاء مهما حصل يجب عدم التشكيك فيه ونظرة القضاء مهما يكن نزيهة
مشاري
القضاة في النهاية بشر وليسوا ملائكة
انتقادهم لا يعني اننا نكرههم
انتقادهم يعني اننا نريد تصحيح الخطأ ان حصل
http://www.boba7ar.com/2007/09/blog-post.html
اقرى موضوعي وافهم يافهيم
مركبنا طبعان و كل من يدور على روزته مثل ما سوى جاك
الله يستر
و يحضرني قول المرحومه أسـمـهـان
أنا إللي أستاهل كل إللي يجرالي
اهوا مو بس دوار الجوازات اللي يسوون عقود مع ركات وتخلص الفوس والشارع ماخلص
الديره بكبرها صارت سبيل للبواقين
والخزينه فاجه حلجها حق اللي يبي ياخذ بدون ضمير
سعر برميل النفط يزيد
ومعاه يزيد تقدمنا للخلف
هالشي كان متوقع لأن اللي يصير الحين تراكمات الماضي من سوء تخطيط وتنفيذ
انا مادري ليش حارقين عمركم على السياسه
لوول والله اضحك اذا قريت عن السياسه استانس عليكم احس ان ما في ايدينكم شي تسوونه بس قاعدين تتحلطمون
وملاحظه بالتعليقات ان كل واحد يعلق بموضوع ماله دخل بالبوست ..؟
يحضرني قول راشد الماجد .. ويلي ويلي يا ويلي ويلي ويلي ويلي اه ويلي
حسبي الله ونعم الوكيل
الله على الظالم
بيي اليوم الي يقوم فيه ضمير كل مواطن كويتي مأكول حقه
ربك يمهل ولا يهمل
اليوم فقدنا الامل الاخير
و كانت هذه هي الشعره التي قصمت
مصداقيه الاصلاح و الكلام الانشائي
الي ملينا منه
فاليوم و بعد هذا الحكم بالذات
لا مفر من تكثيف جهودنا
و تكوين جبهه شعبيه لمواجهه سلميه
لاثبات موقفنا الرافض للفساد
مع خالص شكري
بوبحر
بالتأكيد راح اقراه ودايما منكم نستفيد
حلم
كلامك سليم مع اني ماتمنى يصير جذي حق الكويت
وطن
الله يعين
كويت دول
والسؤال متى الشعب يصحى من نومه
بكيفي
آنا ماحرق نفسي على السياسة
آنا أحرق دمي على أمي اللي ربتني وعزتني وارفعت راسي فوق
آنا أحرق دمي على الكويت واهيا تستاهل
أما ان كل واحد يعلق على شي فلأن كل واحد يبي يقدم رايه ويا هلا بكل واحد وآنا من كل واحد أستفيد
ولا اتتعب نفسك بالسياسة ولا تهتم بشي اسمه الكويت لأنها الظاهر آخر اهتماماتك وخلك مع الدق والرقص
سوكي كاندي
الله يسمع منج وتصحى ضمايرهم
غاندي
آنا مع أي عمل هادف حر ديمقراطي لمصلحة الكويت
Post a Comment