قبل لا أدش بالموضوع احب اوضح معلومة مهمة
آنا مو ضد اشخاص ولا عندي مشكلة مع اي انسان
آنا مشكلتي فقط مع الافكار...آنا انسان مسلم ليبرالي وبالتالي فمن الطبيعي اني اختلف بالفكر مع حدس والسلف وثوابت الامة وحزب الامة وحزب الله واي تجمع قبلي وطائفي...يعني مشكلتي فكرية مو شخصية...آنا ما بيني وبين الصانع والشايجي والعمير ومحمد هايف المطيري وعدنان عبدالصمد.....الخ اي مشكلة شخصية...آنا بيني وبينهم مشكلة فكرية
اقول هالشي للي للحين يطالعون السياسة بمنظور العلاقات الشخصية واقول لهم لأ آنا اشوفها من منظور فكري بحت ولا عندي اي مشكلة مع اي شخص نهائيا...وارد واقول اذا كلنا عندنا نفس الافكار جان ما صارت الانتخابات وجان ماحتجنا مجلس امة ليش نسوي كل هاللوية واحنا افكارنا وحدة؟...اتمنى ان المعلومة تكون واضحة وتوصل للكل
_______________
بالرجوع الى العنوان فاللي كنت حاب اقوله ان رغم كل اليأس والتشاؤم من نتائج الانتخابات لكن مازال هناك بصيص امل...ليش؟
اولا...نحيي الكل ومن دون استثناء على قبولهم الحلو بنتائج الانتخابات ولأن شفنا في دول ثانية تنقلب الدنيا فوق تحت بسبب عدم رضى البعض عن نتائج الانتخابات...شوفوا اللي صاير بلبنان ومن قبلها الجزائر وشنو سوا رفض الراي والراي الآخر
وبالتالي آنا احيي الكل على هالروح الرياضية
ثانيا...ابوي ويدي كانوا يطالبون بالديمقراطية من الصفر...انسجنوا ناس وتعذبوا ناس وماتوا ناس بسببها وعشان يطلعون لنا الدستور
اليوم احنا عندنا دستور عظيم يحمي جميع الاطراف من تعسف بقية الاطراف فانتكاسة هني او هناك ما تعني نهاية المطاف وصاج من قال انما تؤخذ الدنيا غلابا
ثالثا...الحكومة ان كانت اصلاحية بالفعل مثل ما تقول ويتردد فاهيا مسؤولة لجمع اكبر المؤيدين لها من كل الاطراف لتحقيق المزيد من الاصلاحات الموصلة لتحقيق التنمية وارساء الدولة الدستورية القانونية المؤسساتية خاصة انها تضم اكبر كتلة داخل مجلس الامة
رابعا...اللي يلفت النظر بهالانتخابات بروز ويوه شابة للتيار الليبرالي مثل الملا والعبدالجادر ومعاهم الراشد بل حتى بروز اسيل العوضي اللي خاضت الانتخابات بمجتمع ذكوري وبوقت قصير وما كانت معروفة على الساحة السياسية والاجتماعية وتهدد عرش احد كبار محنكي حركة حدس واللي صار له 20 سنة تقريبا بالمجلس فهذا شي فوق الممتاز ونتمنى انه يستمر وان الحركة الليبرالية مطالبة من الآن لتوحيد صفوفها للقادم من الايام
خامسا...بروز اسماء كسرت الفرعيات وكسبت الاصوات من الكل فاهيا بالتاكيد راح تعمل للكل مثل حسين الحريتي ومسلم البراك
وكذلك بروز اسماء كسبت اصوات الكل فاهيا راح تعمل للكل مثل عبدالله الرومي وفيصل المسلم والصرعاوي وحتى حسن جوهر اللي نعتقد انه كسب اصوات من الكل
سادسا...على عقلاء المجلس من كل الاطراف التجمع لمصلحة هالديرة والتعاون لتنميتها بدل اضاعة الوقت بالمهاترات
سابعا...ما راح نكفر ابدا لا بالدستور ولا بالديمقراطية لأن الدستور يعني الدولة والقانون والديمقراطية تعني الحياة الحرة الكريمة اللي دوما سعى لها الآباء ومن قبلهم الاجداد وطول ما فينا حياة راح نواصل محاولات الاصلاح يمكن نيأس بيوم يمكن يحوشنا التشاؤم بيوم
بس والله والله والله والله والله عهد يا كويت ياللي كنت سكني وملفاي واللي بحول الله راح تعيشين على المدى وطنا ما راح يوقفني عن حبج الا الموت عشانج
وآسف جدا جدا جدا على الاطالة
