أكد وزير النفط بالوكالة أن قرار لجنة التحقيق بحفظ البلاغ عن المتهم علي الخليفة لم يقنع المواطن العادي بأن العدالة أخذت مجراها
وأن قرار اللجنة بالحفظ باطل لخلوه من الأسباب
وأكد كذلك أن التقارير الحسابية أكدت وجود تحويلات مالية بملايين الدولارات(حسافة نسيت أعطيهم حسابي) بين حسابات الوزير المتهم وحسابات بقية المتهمين وأن لجنة التحقيق لم تلتفت الى كل هذه الأدلة
هذا مو حجيي آنا...هذا حجي وزير بالحكومة
وبالتالي
اذا كانت أكو أدلة واضحة وضوح الشمس مثل ما يقول الوزير
واذا هالأدلة متوفرة وموجودة بحوزة الحكومة اللي قدمتها حق لجنة التحقيق
واذ عرفنا ان أكو حكم سابق ضد المتهم علي بابا سنة 1996 سقط مو لشئ الا لخلوه من تاريخ الصدور
عيل ليش كل هالطوالة بالقضية؟
وليش ما يعتمدون على كل ما سبق وينهون هالقضية؟
بس السالفة شكلها امتداد للصراع اللي قاعد يصير بالديرة بين أطراف متعددة بالأسرة
وامتداد للخبطة الحكومية
24 comments:
خلف الله عليج يا ديرتي
كل من يحذف فيج من صوب
حسبي الله و نعم الوكيل فيهم
أحد يسوي بأمه جذي؟
أعوذ بالله
إلا إذا كانوا لقطاء و اتوقع هذا اللي صاير
طوّل بالك
وزير العدل ناطر يحل مشكلة العنترنت أولا ثم يحل مشكلة الناقلات
لا زال الطريق طويل
بس نفسنا اطول :)
ومتابعين بالتأكيد :)
سدرة
والله حتى اللقيط ماعتقد ينسى فضل اللي رباه
مطقوق
اهوا أساسا يعرف يستخدم العنترنت
حمد
أكيد بنتابع
اي والله يا سدره كل من قام يحذف فيها ماتستاهل والله
الله يعينا
اهم شي العنترنت ..
الله يحفظ الكويت ..!!
اهم شي العنترنت ..
الله يحفظ الكويت ..!!
اذا حبتك عيني ما ضامك الدهر يا خوي
المفروض يضيفون هالمثل على دستورنا
لسه لما نشوف اخرتها
المكتوب على الجبين لازم تشوفه العين
السلام عليكم
اولا مشكور على الكلام اللي قلته في ردك السابق , ماقصرت ولك مثله من الاحترام لمتبادل عزيز وغالي
بالنسبة للموضوع هذا فا اوافقك الراي تماما , نعم عندنا تخبط ما تشيله البعارين
والله هالبعارين مبتلشة فينا لا حكومة ولا وزارة ولا افراد عارفين اشلون يشتغلون :)
هذا مو راي الحكومه
هذا راي الوزير الشخصي
ولا الحكومه ماودها
بس العليم رجل
ايه الي بالجرد يطلع النلاس ولو ان الي بالجدر مايبشرش بخير ابدا
ما يصير أعتماد على الي طاف القانون لا يسمح ؟ و لا تنسى أن القانون المعتمد عندنا مصري ؟ يا رب يا ساتر صح ؟
وأن شاءلله تنصلح الامور
Don't lose hope.
We'll get there. Inshalla
قد يخالفني الكثير
لكن اراها زوبعة في فنجان
بمعنى ان هذا الاجراء لإمتصاص السخط الشعبي من الحكم وستكون المحصلة النهائية كالبداية تماما
بأنتظار 18 سنة اخرى
لرؤية كيف العداله تطبق على الكبير قبل الصغير..
تحياتي
هذي يمكن ثاني مرة اقول لك هالحجي, بس ما يخالف
الحلو إنك تطرح السؤال وتجاوبه
بس انا عندي لك سؤال... لي متى بنرضى بهالوضع؟ أبناء الأسرة في صراع وإحنا نطالع والديرة ماكلتها؟
مممممممم
بس انا اللي اعرفه ان علي بابا
رفيج سندباد تاب وصار زين يمكن
اخترب بالجزء الثاني مادري ماشفته
:P
نشوف اخرتها
:)
مو بس الوزير يدري
كل الكويت يدري
بس ماينلام القاضي ماكو تاريخ
مايصير يظلم يه
مرحبا ..
سؤال داش عرض ..
علي الخليفه شيصير حق الشيخ صباح ؟
ما هي صلة القرابه بينهما ؟
تحياتي
شكرا لكل من علق على الموضوع
حياة
اهما من نفس العايلة ولكن صلة القرابة بعيدة شوية
Post a Comment