خطة الحكومة الخمسية أو نقدر نقول انها الخطط الأبدية لجميع الحكومات الكويتية المتعاقبة تتمثل بالآتي
أولا: محاربة الدستور بشكل متواصل ويتم ذلك اما بتنقيحه أواصدار قوانين تنتهك مواده وتعطيل العملية التنموية لتكفير الناس بالعملية الديمقراطية
ثانيا: الهاء المواطن بمشاكل الأزمة المرورية مع سهولة الحل حيث يمكن انشاء أفرع لجميع الوزارات بالمدن الأخرى والمكتملة الخدمات مثل الأحمدي والفحيحيل والجهراء
ثالثا: تأخير عملية انشاء السكن الحكومي للمواطن عشان ينغث بالايجارات مع توفر الموارد المالية بدليل وجود الفوائض والبوق اللي شغال بدون حسيب ولا رقيب أو التحجج بندرة الأراضي على الرغم أن كل المدن وضواحيها وبكل سكانها وخدماتها لا يستغلون الا 10% من مساحة الدولة البالغة حوالي 18000 كم
رابعا: عدم الاهتمام بالبنية التحتية عشان يكسرون سيارات المواطن أو يغرقونها بالمطر وبالحالتين ينشغل بالكراجات 24 ساعة
خامسا: عدم تطوير الخدمات الصحية عشان يذل المواطن نفسه عند النواب وايييبون له موافقة للعلاج بره
سادسا: الحرص على انتشار الواسطة والرشوة وكسر القانون واللي ما يحب جذي خله يموت من القهر
سابعا: ابقاء العملية التربوية منحصرة في التلقين ليما صارت أجيالنا نموذج للتقليد الأعمى واللي مو عاجبه خله يودي عياله مدارس خاصة
ثامنا: الحرص على نشر التطرف القبلي والطائفي وتفرقة أبناء البلد الواحد عملا بنصيحة الانكليز اللي كانوا يستخدمونها ضد أعدائهم واحنا نستخدمها ضد نفسنا
تاسعا: العمل على افقار المواطن لتسهيل عملية السيطرة عليه عن طريج رفع أسعار السلع الضرورية ورفع أسعار الأراضي بشكل جنوني ومبالغ فيه عن طريج الاحتكارات
وبالتالي نستنتج ان خطط كل الحكومات وحدة واهيا
الهاء المواطن بمشاكل مالها أول ولا تالي والهدف
افساح الطريج حق قوى الفساد لتعيث فسادا على هذي الأرض الطيبة
20 comments:
اذا جذي بس يبه راضين
الحين حتى القضاء ما سلم من خططهم
خوش خطط الصراحه
متعوب عليها يعني الخطه مو شغل على الماشي
ههههه
هم فيه مايبنون ملاعب ولا شي عشان يخلون الناس تجابل الدوري الاوربي الي كلشي فيه حلو .. وتنسى الكويت :)
كلاااااام كبييير يصعب على امثالي فهمه
بس انا اقول الله يخلي الحكومة
مو مخليه علينا قاصر
النفط وصل قريب ال 100 دولار
وطاف الصيف وما انقطعت الكهرباء
وانا بالبيت ما عندي
لا شارع
لا ماي
لا تليفون
لا صرف صحي
هذيل الشغلات مو مهمة لانه لو كانت مهمة جان اكيد حطوها بالخطه الخمسية
شفتوا اشلون
الله يخلي الحكومة
يا رب النفط يرد يصير ب 8 دولارت البرميل.... خل اشمت بالحكومة
انا اول مرة سمعت هالمصطلح كان وانا صغير في مسرحية العيال كبرت
لما سعيد صالح قال
فيه
خطه رومي وخطه سيامي
خطط خمسيييه ..ايييييه؟؟؟
ومن يومها وانا عرفت شنو اهيا الخطه الخمسية
و يقولون الحكومة ما تعرف تنفذ خططها
الحكومة تخطط ؟؟؟؟؟؟؟
الحكومه لو بتخطط ملعب بسميت أبيض تلقاها أختلفت منو اللي يشتري جيس السميت....ويرد يبيعه عليها بدبل!!!
السلام عليكم
مشكور اخوي على هالمقال اللي الكل يتفق معاك بكل كلمة فيه
لكن هل فيه دولة او دول كاملة بكل شيء غير الكويت ؟
اللي اشوفه ان كل الدول غير كاملة في القوانين وفي تطبيق القوانين مو بس الكويت , خل انقيس هالشيء على الدول القريبة منا وهي الامارات وخصوصا دبي
احنا لما انروح دبي راح تبهرنا الديره بكل شيء من بنايات و من تعدد الجنسيات و من اسواق غريبه عجيبه
لكن هل قعدنا مع اهل دبي وشنو رايهم باللي قاعد يصير ؟؟؟؟؟
لي اهل بالامارات وعندي اصدقاء من الامارات تدري شنو يقولون ياخوي ؟
يقولون ان انتوا يالكويتيين عايشين بنعمة , الخدمات الصحية ببلاش الماء والكهرباء تسعيرتها اقل منا بواااايد
التعليم عندنا هم ببلاش
مع العلم ان التعليم الحكمومي بالامارات فيه ببلاش وفيه بفلوس ويسمون اللي بالفلوس التعليم النموذجي
وتدري شنو يعانون منه الاماراتيين ؟
الخدمات الصحية بفلوس , ارتفاع الاسعار بشكل كبير لدرجة ان العوائل ذو الدخل المحدود يشترون ماجلة البيت كل اسبوع
الحكومة عندهم ما تدعم بعض السلع الرئيسية مثل الكويت
ادري طولت لكن هم اتفق معاك باللي قلته لكن كل هالمشاكل اللي قلتها موجودة بأغلب الدول
لكن احنا البوق مو امخلينا نتنفس عدل
صحيح الدول المجاورة فيها بوووق لكن على الاقل يبنون ديرتهم مو احنا البوق اهم من البنيان
لك مني كل تحية واحترام
حمد
اووووووه نسيته من كثر الأشياء اللي هدموها بالديرة
كويتي بلوغر
ننساهم ولا ننسى الكويت
بوجاسم
حكومة الكويت صل على النبي
مطقوق
خطط الخراب اهما أشطر ناس فيها
حمودي
اي
حق الهدم تخطط ونص
الفنطاس
أهما أحسن ناس بالبوق
someone q8
ردك وايد ممتاز
بس آنا ما أقارن الكويت بالدول العربية
آنا أقارن الكويت بالدول المتقدمة ولما أنتقد همي ان الكويت توصل لمصاف هذي الدول
الدول العربية ودبي منها ماوصلوا ليقال عنهم دول متقدمة
على الوتر الحساس
كل اللي قاعد يصير من تخطيط و تنظيم وخراب و بوق الحكومة عارفة وتساعد قوى الفساد بعد عشان تلهينا
بس قاعدين على قلوبهم و مفتحين باللبن
اللي يشوفني بعين أشوفه بثنتين
@@
يسلم قلمك
اكو ناس يقولون ان من بطالتنا الزايده نعتقد ان من سياسه الدولة تلهيتنا بهذى الامور علشان ما نشاغلهم ببوقهم و سياستهم الحكيمه
سدرة
عدل والله عدل
وتسلم عيونج
براقش
تسلمين
بس علشان تنقهر اكثر نسبة الاراضى المشغولة ما تتعدي 5% انتى بريتهم لما قلت 10
:)
Post a Comment