هذا الموضوع طرا على بالي نتيجة للأوضاع السياسية اللي تعيشها الديرة
وبصراحة آنا من المؤيدين لتحويل الكويت لملكية دستورية وذلك لعدة أسباب
أولا ان هالشي يساهم في ترسيخ احترام الدستور لأنها راح تكون ملكية دستورية ويطور العملية الديمقراطية على غرار الممالك الأوروبية اللي الملك فيها يملك ولا يحكم
ثانيا انها تفسح المجال أكثر لقيام الأحزاب
ثالثا انها تفتح الأبواب لتحقيق حلم الوزارة الشعبية
رابعا الملكية الدستورية راح تكون وراثية من الأب الى الابن وبالتالي تلغي صراع عيال العم على الحكم اللي قاعد يدخل البلد في مشاكل وايدة
هذا رايي المتواضع جدا جدا في هذا الموضوع
وأبي أعرف آراءكم بالتحول للملكية الدستورية
بس أتمنى ان طرح الآراء يكون بشكل هادي وبدون أي تجريح لأي طرف
20 comments:
صباح الخير
باختصار:
لا .. مو وياك بهالشغله
ليش وشحقه .. مادري
انشالله جوابي كان هادي :p
سيليزيا
طول عمرج هادية
ممتاز
بمعنى آخر أن تكون لدينا حكومة شعبية .. يختارها الشعب .. حتى رئيس الوزراء يكون من الشعب
ويظل الامير أو الملك (مو مهم المسمى)هو الخير والبركة ..
الحارث
ونفتك من خلافات عيال العم على الحكم بأنه يصير من الأب للابن
معاك قلبا و قالبا
:)
سدرة
شكرا
ما أدري والله شقولك بس المهم الاحوال تتعدل
لو كان تغير المسميات سيغر واقعنا لغيرت أسمي من عنتر لفريد
بس
ان شاء الله تتعدل
شنسوي لازم نحاول نتحرك
حلم
كلامك صح
بس لازم نحاول نتحرك ونغير والا بنموت
يا بعد عمري ..الملكية الدستورية ناجحة بأوربا لان الشعوب هناك شعوب تربت على التعاون والعمل الجدي والابداع في العمل الجماعي ..اما عندنا في الديرة الدولة ضافت على شعبنا الاصيل شعبا اخر من خلال التجنيس فاصبح الشعب مكونا من الربع الواعي والمتحضر والثلاث الارباع الباقيين يحملون معهم جميع طرق حياة المخلوقات ماعدا الانسان مثل القبلية والطائفية ويتطبعون باخبث الاخلاق ابسطها الانتهازية والوصولية واقواها المحافظة على انفسهم وبلدهم الجديد عليهم من التطور والرقي لكي يستمر سلطانهم في بلد الفساد
أول مره اخالفك يا نهاش وفلتشهد يا تاريخ :))
يمكن انت عندك وجهة نظر تفصيليه اكثر من الي كتبته عشان اشوف وجهة نظرك وانظر اليها من كل النواحي والابعاد
ذكرتني بسالفه.. ذاك اليوم واحد من الربع فتح هالموضوع بالدوانيه طبعا انا نسيت الهدوء واكلته بقشوره بس معاك بصير هادي :)
شنو راح يفرق بتغيير المسميات ؟؟ اذا تحولت الكويت الى مملكه فراح تتغير كل قوانين الكويت والدستور راح يتغير وهنا تأتي الطامه الكبرى
يعني اذا تغير الدستور (وهذا الي يبونه من زماااااااااان)
شنو يظمنلك ان الدستور الجديد راح يظمن حقك وشنو الي يظمنلك انه راح تكون فيه مساحه للحريات مو يمكن نصير نفس دول المنطقه الي حوالينا؟
وشنو يظمنلك ان هالدستور راحيكفل حقوق المواطنين
ترى عادي الدستور الجديد يتفصل على حسب الي اهم يبونه وراح يحطون فيه ثغرات كثيره عشان ما تقدر انت يالمواطن ان تقول لأ
وهم بعد بيكثرون عندك الفداويه .. تدري انا من اقصد الي على شاكلة رفيجي الي طرح الموضوع
راح يقعدون تحت الملك وهم بيلعبون بالديره ويفسفسون بالحلال
وعلى مساله تناحر عيال العم مااتوقع ان احد يقدر ياخذها غصب على الشعب والتاريخ يشهد بذلك الا في بعض المرات القليله
ترى دستورنا ممتاز وقوانينا زينه لكن الشعب خايرها وقاعد يوصل اشكال حق المجلس مو كفو
اذا انت بتسعى لازم تسعى على تفعيل الدستور والقوانين
وعلى توعية الناس وتعرفهم الصح من الغلط والشين من الزين لان الكويت كانت بيوم من الايام درة الخليج
وانشالله راح تظل درة الخليج بوجود الشباب مثلك وشرواك بدون تغيير نظام الحكم
سوري على الاطاله والتأخر بالرد
بس الدوام عصلقوها معاي شوي :))
تحياتي يا فتى الجبل
ano
صحيح
التجنيس غير الواعي شوه البلد من كل النواحي
مهندس
لما تكلمت قصدت ان احنا نصير نفس نظم أوروبا الملكية وهذا حلم من أحلامي
حلمت نصير نفس بريطانيا واسبانيا وهولندا وبلجيكا ولوكسمبورغ والدانمارك والسويد والنروبج
حلم أتمنى يتحقق
aHa
عيل احلم بعد قلبي الحلم ببلاش :)
بس لا تنسى وانت قاعد تحلم انك عربي ومسلم في آن واحد
توهقت صح احلى كابوس :)
سجل على الطوفه انا معاك بكل كلمة....ورأيي من رأي ابن الحارث
مهندس
لا عزيزي ما توهقت
لأن أي طموح بالدنيا بدايته حلم بسيط
وان شاء الله يتحقق
الفنطاس
وآنا معاكم
ممكن لكن في زمن غير هالزمن
نجله
اذا مو بزماني أتمنى انه يكون بزمان عيالي اللهم آمين
Post a Comment