Monday, June 9, 2008

وتزداد المخاوف على الحريات المكفولة دستوريا

اليوم...وعقب الزحف المنظم من قبل المتاسلمين لوأد الحريات المكفولة دستوريا وقانونيا بدولة المؤسسات
نناشد جميع القوى الديمقراطية والمدافعة عن الحريات لتنسى خلافاتها الهامشية ولتتحد وتتفق على حماية هذي الحريات
نناشد ونطالب قوى نبيها خمس الشبابية اللي هزت الشارع للقيام بواجبها وحماية حرياتنا الدستورية اللي يبون سلبها
اليوم المتاسلمين صاروا يتعاملون معانا وجن احنا كفار قريش...كل شي حرام وكل شي ممنوع
وياخوفي باجر يمنعون السامري والصوت والزهيريات وغناوي البحر...ياخوفي باجر يمنعون الغناوي باعراسنا وافراحنا
والغريب انهم مامنعوا قلطات الشعر والعرضات على الاقل على قاعدة ( والشعراء يتبعهم الغاوون )... صدق الله العظيم
اليوم...وعقب خوف حتى الشيوخ منهم...اليوم...وعقب رغبة المتاسلمين الواضحة لتحويل الدولة المدنية لدولة طالبانية
نناشد ابونا ووالد الجميع صاحب السمو الشيخ صباح الاحمد امير البلاد لانقاذنا من زمرة متاسلمة كل همها القضاء على حرياتنا
نناشد والدنا وابوالكل سمو الشيخ صباح اللي بيوم من الايام قال انه واحفاده يستمتعون ببرنامج ستار اكاديمي تحريرنا من عقليات متحجرة
نناشد سموه عقب ما فلسنا من مناشدتنا لحكومة ضيعت حقوقنا الدستورية والقانونية وضيعت دولتنا...نناشد سموه عقب ما شفنا سكوت القوى الحرة عن مواجهة طوفان الانغلاق وتكفير المجتمع...نناشد سموه عقب غفلة القوى الوطنية للدفاع عن الحريات
نناشد سموه ارجاع دولة الكويت الدولة الدستورية القانونية المؤسساتية المدنية دولة الطيبة والسماحة دولة الفرح والمرح والسرور الهادف والبريئ
نناشد سموه لتحرير الديرة من جحافل تيارات الردة المتاسلمة
مالنا يا شيخنا ووالدنا غيرك بعد الله نشكي له من سوء الحال بديرتنا

35 comments:

حياتي هدف مو عبث said...

مادري شقوول


بس الله يكتب اللي فيه الخير للكويت

Mohammad Al-Yousifi said...

شنو يعني , شتبيه يسوي؟ هذا اختيار الشعب الواعي المتحضر

kamikaz said...

المفروض ان الوطنيين يعيدون توحيد صفوفهم ويوسعون قواعدهم

ويختارون ناس تعرف تتكلم , لانهم يفشلون بصراحة

عندك المنبر مثلا نفس الوجوه صارلها 100 سنة

كلش ما حاولو يدخلون وجوه جديده معاهم ,


غير جذى الامير ما يقدر يسوى شئ


ومثل ما قال

kila ma6goog said...
شنو يعني , شتبيه يسوي؟ هذا اختيار الشعب الواعي المتحضر

someone_q8 said...

السلام عليكم
اخوي فتى , الحين هاللوية وهالكلام الانشائي اللي قريته سواء باللنكات اللي حاطها او باللي كاتبه كله يندرج تحت موضوع واحد فقط وهو عشان ستار اكاديمي ؟؟؟؟؟؟
يعني ستار اكاديمي اللي قاعد يصير فيه شيء حلو ان الواحد يطالعه , والشباب الصغار والجيل المقبل من شباب وبنات حلو انهم يشوفونه ؟ شنو الشيء المفيد اللي يستفيدون منه وياخذونه قدوة في هالبرنامج ؟؟؟

اخوي فتى خل اقولك آية من القرآن اللي المفروض نتبعه وما نتبع اهواءنا
قال الله تعالى : وَأَطِيعُواْ اللّهَ وَالرَّسُولَ لَعَلَّكُمْ تُرْحَمُونَ (آل عمران:132)

وفيه شيء ثاني وهذه قاعدة بالدين وهي : لاطاعة لمخلوق في معصية الخالق

تكفون مو على موضوع تافهه ومايسوى اتسوون قضية وأد الحريات ومادري شنو وآخرتها على ستار اكاديمي

بعدين في شيء ثاني انا عازمك عندي بالمدونه ابيك بكلمة راس :)))

حبيب والله اخوي فتى :)

Sn3a said...

انا اناشد سمو الامير باللي تناشد فيه

وعلى فكره
القوى الوطنيه بالكويت
مو على قلب واحد
ولا بيكونون على قلب واحد

لكن جماعه هايف ومثله لا
هذيل هدفهم واحد
عشان جذيه متقدمين علينا بكل شي
وخوفي
يسوون اللي يبونه
يخلون الكويت فرع السعوديه

الله يستر

Anonymous said...

خبز خبزتيه يالرفله اكليه

هذا خبزنا يا فتى الجبل

أنا كويتي said...

أخي نهاش

سمو الأمير عطانا فرصتنا بين إيدينا مقشرة و شحلاتها. حل دستوري و قال يللا, إبتدوا صفحة جديدة.شنو سوينا؟؟
تصرفنا مثل المدمغين حشاك, و إخترنا المتردية والنطيحة.
والنتيجة مثل ما إنت شايف. بإيدنا نخرب بيتنا

كويــتي لايــعه كبــده said...

لا تنطر خير

مشوارنا الى الاسفل مو توه بادي

Selezya said...

عسى بس يسمعونك

راعي تنكر said...

اي شي؟
شلون تبي دولة دستورية ومؤسساتية
وبنفس الوقت تبي الامير يتدخل؟؟
المشكلة لا في الاسلاميين ولا في القبليين
المشكلة بالقوى المنفتحة اللي عجزت انها تروج لمشروعها
العلة فينا احنا
تكفون بطلوا اسطوانة الارتماء في حضن الامير كل ما فشلتوا

Blog 3amty said...

ما يقدرون، وراهم شعب واعي، بس مسطّل هاليومين، حزّت الحزّة تشوف القزعة


blog 3amty

فتى الجبل said...

حياتي
والله يا اخيتي آنا كل اللي ابيه اني احافظ على الحريات المسؤولة لا غير

فتى الجبل said...

مطقوق
اختيار الشعب صح
بس اي شعب؟
مو هذا الشعب اللي ربته الحكومات المتعاقبة على الكسل والربادة والاعتماد دايما على الغير مو الشعب اللي وعى من نعومة اظفاره على حكومات تتحالف مع تيارات متاسلمة ضد صالح الديرة
وين شعبنا اللي كان يكد ويشقى عشان لقمة عيشه
وين شعبنا اللي كان يعيش بينه المسيحي واليهودي وكل الجناس
مو الحكومات المتعاقبة اهيا اللي محت كل هذا
عيل خلهم الحين يلاقون لنا حل دام القوى الديمقراطية نايمة وتايهة بمشاكلها

فتى الجبل said...

كاميكاز
اسيل كانت جدامنا ليش محد ساعدها؟
العنجري كان موجود ليش محد ساعده؟
المدعج كان موجود ليش محد وقف يمه؟
والله ادري الحين ان العيب بالشعب
بس لازم الحكومة تتحرك

فتى الجبل said...

someone
اولا الموضوع مو بس ستار اكاديمي
ستار اكاديمي يالحبيب تقدر تشوفه بالفضائيات علما انها مو مشفرة
وحتى المشفر تقدر تشوفه بالانترنت وتفج شفرته المقصد اللي يبي يروح ستار اكاديمي برضا امه وابوه شكو نعين نفسنا اوصياء عليهم مثل ان مالي حق اقول حق المتدين اشحقة مطول لحيتك واشحقة مقصر دشداشتك علما ان شنو مقاييس اللحية الاسلامية طويلة نفس السلف والا قصيرة نفس الاخونجية
تقصر الدشداشة لي الركبة والا لي الكعبين
شفت اشلون ان حتى المقاييس الاسلامية تفرق من حزب لي الثاني
ثانيا القصة مو قصة ستار اكاديمي
القصة هجمة على الحريات وشوفهم اشلون عقبها بلشوا بالتفلسف
يعني اللي منع اليوم حفلة خاصة باجر بيمنع وجود القصار او اي مطرب ثاني بعروسنا ياخوي
ثالثا اخلاق المجتمع ما تتناقش بطريقة العصا والجزرة والمنع انما تناقش بهدوء والكبت دوم يولد الانفجار
رابعا المجتمع السعودي مجتمع مغلق وفيه لجنة للامر بالمعروف والنهي عن المنكر
ولكن هل الاخلاقيات هناك افضل
لا والف لا
مخدرات ومشروب وسرقة واغتصاب...الخ
لأن الكبت يولد الانفجار
خامسا ماعرفنا الاخلاق المنحطة الا مع قدوم جماعات التاسلم اللي خلت المجتمع مجموعة من الذياب الرجال اللي يبون ينهشون جسد المرأة
ليش المتاسلمين نظرتهم دايما جنسية؟
مجتمعنا طول عمره كان فيه الطرب والاختلاط شنو اللي استجد من يوم يووا هالتيارات
اللي استجد ان نظرتهم حمدالله والشكر جنسية لكل الامور

فتى الجبل said...

سنعة
للاسف ان قوانا الوطنية تايهة

فتى الجبل said...

محسد
خبز يابس ومعفن

فتى الجبل said...

آنا كويتي
الله يستر

فتى الجبل said...

لايعة جبده
وين شباب نبيها خمس
ليش ساكتين ولي متى
ليما تطيح الفاس بالراس

فتى الجبل said...

سيليزيا
اللهم آمين

فتى الجبل said...

راعي تنكر
الامير جزء من الدستور ياخوي اذا كنت غافل عن هالشي
واهوا رئيس كل السلطات الدستورية من قضائية وتنفيذية وتشريعية
ومو عيب نهائيا ان احنا نستنجد فيه

فتى الجبل said...

موك
ما عليك زود

فتى الجبل said...

بلوق عمتي
اي بس لي فات الفوت
ترى ما ينفع الصوت

someone_q8 said...

السلام عليكم
تصدق عاد لما ادش عندك واختلف معاك في اكثر من موضوع احس كأني داش بيت اخوي آخذ راحتي بالكلام لاني ادري اني كسبت اخو يتحملني واتحلمه , احيي فيك هالروح اخوي فتى والاختلاف في الراي لا يفسد للود قضية

فتى الجبل said...

someone
قلت لك اول
واعيدها الحين
احترم نقدك لأنك محترم بكل شي بما فيها طريقة نقدك
حياك

Anonymous said...

لالا خل سموه مرتاح مانبيه يتدخل

Kuwait said...

البدايه لجنة الظواهر السلبيه ..
والقادم أردى ..
الله يستر ..
تقبل مروري ,,
kuwait

dalal said...

قليلا من التفاؤل يا فتى الجيل لا زالت الديره بخير انشاءالله

سدرة العشـــاق said...

شقول شحجي

خلنا ساكتين

بس بحط رابط لمقالة لصلاح الهاشم بجريدة الرؤية "السلفية" تفضل:

http://www.arrouiah.com/node/21334

فتى الجبل said...

حمودي
والله يا حمودي صرنا مانعرف منهو طقاقنا

فتى الجبل said...

كويت
مو عشان جذي لازم ما نسكت

فتى الجبل said...

دلال
نعم مازالت بخير
بس اللي يبون لها الشر وايد
ولازم نتصدى لهم

فتى الجبل said...

سدرة
مشكورة

Anonymous said...

اوافقك الراي فعلا الكويت بدات بحريتها وهذيل يايينا يبونا نصير السعوديه .. طيب روحو السعوديه اللي انتو هديتوها بالاساس وعيشو فيها اذا يايزلكم الوضع وبشوف اذا تحملو اسبوع

كفايه تاسلم ترى الديره كانت بخير قبل لا يخربونها هالمتاسلمين

وعساك على القوه

فتى الجبل said...

آنو
الحكومة اهيا الراعي الرسمي لهم للاسف