الكويتي أمس بنى ديرته باخلاص ووفاء
الكويتي اليوم يهدم ديرته وبكل جدارة
الكويتي أمس دش البحر بكل مخاطره وسافر شرق وغرب عشان لقمة العيش
الكويتي اليوم ياخذ راتبه واهوا نايم بفراشه
الكويتي أمس كلمته مسمار بلوح ما تحتاج لا عقود ولا شهود
الكويتي اليوم يوقع مع البنك طلب القرض وثاني يوم يتبجبج ويطلب من الحكومة اسقاط قرضه
الكويتي أمس طيب ودود متسامح
الكويتي اليوم متعجرف عنصري متبلد الاحساس
الكويتي أمس عنوان للحضارة والتقدم
الكويتي اليوم عنوان للتخلف والجهل
الكويتي أمس قنوع
الكويتي اليوم جشع طماع
يا ترى شنو اللي غيرنا وبدل أحوالنا؟
اهوا عبث الحكومة؟
اهوا التجنيس بعشوائية دون الانتقاء؟
وليش لما يجنسون ما يسوون اختبارات عن تاريخ الكويت ولهجتها وهويتها مثل ما يصير بالدول المحترمة؟
اهوا أساليب التعليم التلقينية؟
من المسؤول عن ضياع الهوية الكويتية اللي اطبعت في السابق شخصيتها بالعالم؟
وليش نسينا حتى حجينا الحلو وقمنا نتحجى بلهجات ييراننا؟
منو المسؤول عن كل هالشي؟
31 comments:
وليش اول انطق عمان 6-0
والحين بس نبي نتعادل معاهم
هذا كله له سبب واحد
ماكو تخطيط
اي ديره مالها نظره مستقبليه هذا مصيرها
بس اخوي نهاااش
ليش كل هل تشاؤم
تره ليلحين الديره فيها خير
خوش بوست
------------
اعتقد ان مثل اذا كان رب البيت بالدف ضاربا فشيمة اهل البيت الرقص تركب علينا ككويتيين
السلام عليكم
الله يعطيك العافية ياخوي على هالكلام اللي يعور القلب
لكن لي رأيي المتواضع وهو كثرت المادة بينا ياخوي ولما الفلوس تكثر ابشر الصراعات حتى بين الاخوان فا بالك بين الشعب !!! واعتقد ان المادة اهي سبب من الاسباب وليست الرئيسية
ومن الاسباب بعد تنوع الاجناس بين الشعب
يعني قبل كانوا الكويتيين معروفين كل واحد يعرف الثاني لان الديرة كانت صغيرة اما الحين كبرت وبالكويت فيه الحين 140 الى 200 جنسية
وهالجنسيات لازم يغيرون من الطبايع بحكم الاحتكاك العملي والاجتماعي
وايد اسباب ياخوي لكن المفروض ان هالجيل او جيلنا كثر ما يقدر يحاول انه يغير او انه يسوي شيء غير للأجيال القادمة
لك مني كل تحية واحترام
كويتي بلوغر
تهقه للحين الديرة بخير
ولي متى ننطر ونقول احنا بخير؟
ليما الفاس تطيح بالراس
ترى اذا فات الفوت ما ينفع الصوت
حمودي
تركب ليش ما تركب
someone q8
أمريكا غنية وفيها وايد أجناس
بريطانيا غنية وفيها وايد أجناس
هولندا غنية وفيها وايد أجناس
كندا واستراليا وسويسرا ونيوزيلاندا
كلهم أغنياء وفيهم وايد أجناس
بس عندهم قانون الكل يمشي عليه مثل الساعة واللي يطلع عنه يعاقب
وهذا اللي ينقصنا
لو خليت خربت يالشيخ
ولما الحين الكويت فيها ناس تسوى وقلبها على البلد مثلك وشرواك
والله عورت قلبى
:/
نكستنا هذى ترى صارت ورا الغزو انا اشوف
!
الله يحفظ الكويت بأهل الخير الى فيها ويدفع عنا البلاوى
زوزوتا
أتمنى اني أكون غلطان
كاريزما
مع ان كان المفروض انهم يردون ويبنون الكويت صح خاصة ان الناس كان عندهم استعداد حق هالشي
بس الحكومة بربس وبربستنا معاها
للاسف المسؤولية مسؤولية السلطة وحلفائها قوى الرجعية الدينية .
---------------
يقيم المنبر الديمقراطي ندوة تحت عنوان (مقصلة الرقابة في معرض الكتاب) المتحدثين
ليلى العثمان و ميس العثمان وهبة بوخمسين وعقيل العيدان وذلك في الساعة 7:15 مساءا يوم الثلاثاء بمقر النيباري في ضاحية عبدالله السالم ق 4 -شارع سيد علي سيد سليمان منزل 4 جادة 48
والدعوة عامة
حمد
مشكور على الدعوة
وان شاء الله بيي
:( ياااقلبي قلبك حده بوست يعور القلب
الكويت الحين تعبانه شوي عسا الله يقومها بالسلامة وبخير وعافية ومثلها اول بكل النواحي
قول آمين
ضيقت خلقي لي درجة ما فيني شدة اعلق
نظل متفائلين
سيليزيا
آمين
مطقوق
مو لأن احنا متفائلين قاعدين ننتقد لعل وعسى يوصل صوتنا
طقاق روحه ما يصيح
هذي تالية السكوت ... تحجينا بعد ما خلينا قوى الفساد تمسك المناصب الكبيرة
و يينا نقولهم قوموا ... معوزنا بس الله أقوى إن شاء الله
كلامك يعور القلب
أخ عليج يا كويت
سدرة
الحقيقة دايما مؤلمة
والمؤلم أكثر ترك المريض يعاني بدون معالجته
كلامك كله عدل وصائب يا فتى الجبل
شتان مابين الأمس واليوم
كثرت عندنا بالديرة الأمراض الإجتماعية
اللى كانت بالسابق غير موجودة
أو وجودها زي عدمها
بس راح نظل متفائلين بــ غدٍ مُشرق خالى من هالشوائب
وقواك الله يا فتى على البوست الممتاز بالفكرة و المقارنة
يعور القلب
صدقت والله
عسى ربي يكتب لنا الخير بالخطوات القادمة
انا اقول احنا السبب
الدلال الزايد -وانا اخيتك- والتبطر عالنعمة
جيل ما بعد النفط تعود إنه يلاقي كل شي جدامه زاهب مزهب, وهذي نعمة فضيلة من ربٍ كريم, لكن حولناها لنقمة بعدم تقديرنا لها وتجاهلنا للحقيقة اللي تقول ... النعمة زوالة
ثقافة الإستهلاك وقصر النظر صاروا جزء لا يتجزأ من مجتمعنا, وبكل اسف الأهل لعبوا دور سلبي في هالموضوع
كون الآباء دايماً يبون الخير لأبناءهم, فإنهم-بطريقة غير مباشرة-غرسوا فيهم الإتكالية والبحث عن الطريق السهل عوضاً عن الصواب
فئة ليست بالقليلة من الآباء بدل ما يشجعون عيالهم على العمل والإبداع في مجالات متنوعة تثري سوق العمل... يوجهونهم لحكر مواهبهم في المجال ذو الربح المادي الأكبر...مطعم...صالون...مشغل
...عقارات...مضاربات في البورصة
وحتى في هالمجالات...برستيجهم يسمح لهم فقط باتخاذ دور المعزب
مع إحترامي لأصحاب المشاريع السابقة, لكن...تقفون...غيروا شوي
معقولة إن عيال الديرة مو فالحين إلا بهالجم شغلة؟!
الدنيا
ان شاء الله يكون غدنا أفضل
نجمة
سلامة قلبج
براقش
احنا جزء من السبب
مو كل السبب
الزين
اي والله النعمة حولناها حق نقمة
الزين
اي والله النعمة حولناها حق نقمة
دوام الحال من المحال
العولمة و اندثار العادات و تداخلها
اهو السبب
في كل دول العالم مو بس في الكويت
not virgo
يا ليت المسألة بهالبساطة
ما كانش حد غلب
Post a Comment