يا جماعة الحين آنا بفهم مجلس الخدمة المدنية يتبع حكومة ناصر المحمد والا حكومة القطب الجنوبي؟
أكيد بتقولون لي انه يتبع حكومة ناصر المحمد
عيل ليش قبل يومين يوافق على كادر الأطباء والنفط وأمس الحكومة تلغي هذي الكوادر
واذا ماكو أي تمييز حق الطبيب والمهندس اللي اطحنوا بالدراسة سنين وابنين
واللي اكرفوا عقبها بالخفارات الأول يسهر على علاج الناس والثاني يشتغل بين حقول النفط والمصافي اللي كلها مخاطر
فاشلون تبون الشباب يتجه حق هذي المهن...اشلون تقنعون خلق الله انهم يتخصصون بالوظائف الفنية
واذا كان الأطباء والمهندسين يستحقون الزيادة واهما كذلك فليش يعاقبونهم بجريرة اللي ما يستحقون
وعلى الشي اللي آنا قاعد أشوفه أحمد ربي مليون مرة اني انحشت من هندسة البترول لي كلية التجارة
وبهذي المناسبة نبارك للأخوة الاماراتيين بموافقة حكومتهم على زيادة الرواتب بنسبة 70% ولا عزاء لنا نحن الكويتيين بحكومتنا الدايخة
بعدين شكلها حكومتنا ما تسمع بالاضرابات اللي تصير بالدول المتقدمة وآخرها الاضرابين اللي شلوا حركة المواصلات بألمانيا وفرنسا
واحنا نقول لهم ان الاضراب حق مشروع للعامل لايصال صوته اذا حس بالظلم من مرؤوسيه واذا كانت الحكومة تدعي ان الاضرابات قاعدة تتم بشكل فوضوي فاحنا نوافقها بهذا الشي ولكننا نقولها ان من شابه أباه فما ظلم لأن فوضى الاضرابات جاءت بسبب فوضى الفساد والبوق واهدار المال العام والرشوة اللي الحكومة صاكة عينها عنهم ...بعدين اذا الاضرابات غلط عيل اشحقه يصرح الوزير المحيلبي ويقول ان من حق الموظفين اللجوء اليها لرفع الظلم عنهم
آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه
شقتنا هذي الحكومة اللي ما تعرف كوعها من بوعها
40 comments:
اول شي ببدي من اخر شي انتا مستشهد بالوزير المحيلبي ومع احترامي له ولشخصه ولكنه ليس وزير إلا لانه من قبيلة العوازم ومع كامل احترامي للعوازم...ولا اهو ما يدري عن هوا دار الدبلوماسية والسياسة
وبالنسبة لك زين سويت وانحشت لانه غيرك غلط واهو الحين يتحمل غلطته
وبعدين اول ما انقر الكادر الف واحد بارك وهلل والحين لما انرد الكل قال عدل يبي له المزيد من الدراسة اي دراسة اي بطيخ من زمان واهم يدرسونه
وحرام عليهم اذا ما يميزون اصحاب المهن والشهادات ليش ما كلنا نروح الجيش والشرطة احسن علاقات ومعاشات
وبالنسبة للامارات كانت احسن رد وصفعة للكويت لما زادوا وبهالنسبة لانه معروف اخر هالدراسات زيادة 50 ماكو غيرها
و50 دينار مو 50% ...صج ديرة بطيخ
راحت عليهم منهم
ومنهم لله
السلام عليكم
اخوي فتى الجبل
لما العدل ينعدم بالديرة راح تلقا هالسوالف
لما تنعدم الخطة الاستراتيحية للدولة راح تلقا هالبلاوي
لما ينعدم وجود القرار هم راح تلقا هالمشاكل
لما تلقا وجود الشخص الغير مناسب في المكان الغير مناسب الله يخلف علينا :)))
مافيش فايدة
والله تعرف كل شى هالحكومه
بس تبى تذل شعبها
و الامارات ما يزيدون الا اذا احنا طالبنا
رساله خفيه منهم و الفطين يفهم
بوجاسم
آنا مع زيادة المستحقين فقط
الأطباء والمهندسين والوظائف الفنية المتعبة لهم حق بالزيادة
والغريب ان اللي ما يستحقون الزيادة زادوهم كذا مرة والوظائف الشاقة طنشوهم
سيليزيا
ما ضاع حق وراه مطالب
someone q8
كل ليل وبعده لابد من نهار
براقش
ما علينا من رسايل غيرنا
علينا من ديرتنا وبس
والحر عزيز النفس عمره ما ينذل
سلامتك من الآه
بس شنقول غير ...
آه يا أبي يا كتاكت ياللي شايل الهم و ساكت
سدرة
منو كتاكت هذا؟
يبه ليش قاهر روحك
من نولدنا وحالنا جذي
عادي عادي :)
كويتي بلوغر
أبي عيالي ان شاء يعيشون حياة أحسن وأفضل من حياتي
لكويتيين ما يعرفون يضربون عدل
خل يضربون عدل ويخلون القرعه ترعه ويشوفون شيصير
وبشكل عام
الاضرام ظاهره غير صحية لا للحكومه ولا للموظف ولا للشعب
بس امانة
اييب نتيجه
صحيح في خلل بالرواتب بس مو جذي الحل التضخم عندنا كبير والاسعار بزياده وانتوا تطالبون بكادر
واذا مشوا مع الي سووا اضراب باجر حتى عمال النظافه بيسون اضراب وبيعتقدون الناس ان اي شي تبيه اخذه بالقوة
ناصر المحمد لو بقاله ماراح يعرف يدورها....وللاسف التمسك فيه مارجع الكويت الا قرون للوراء....
والغاء كادر الدكاتره والنفط ظلم وقع عليهم والله يجازي الي كان السبب
مو مخسبقنه الا الاضراب على طول الطيران المدني اضربو وربوا علينا نطروا يوم واحد بس
زين رحت علوم ادارايه لان عقب التعب و6سنين من القهر المتواصل تشوف رقيب نفس معاش المهندس المتدرب رقيب يا جماعه يعني شهادة ثانويه شهالدييره لا وتوه زايدينهم بعد 120 دينار ماادري على شنو الظاهر بدل جل لزوم القز
وعلى طاري الامارات اهو بس الامارات معاش المهندس بالامارات وقطر والسعوديه دبلين الي اهني
والله ان شركات قطريه تعرق لنا معاش حق مهندس مبتدئء 2400 دينا وبيت وسياره واذا متزوج وعندك عيال عيالك كلهم مدرسه خاصه وتامين صحي حق كل المستشفيات واهني مستانسين بمستشفى الاحمدي يعني الي ساكن بالديره ويصير فيه شي على ما يوصل الاحمدي الى ميت الريال بس شنقول ما نقدر نطلع من هالديره على كثر ما تحبها على كثر ما تكسر مياديفك
اللهم لا اعتراض
عتيجة
بعد المظلوم شسوي بديرة ضاعت فيها الحقوق وصار فيها الحرامي اهوا السيد
والشريف غبي وما يفهم
حمودي
زين المظلوم وين يولي
ووين يروح
الفنطاس
حتى عربانه البنك والترمس والنغل ما يعرف يديرها
:'(
مع الأسف ما نعرفه بأن الإضراب من حق حتى عامل النظافة
لكنه لم يعد من حق الكويتي
معاش قليل
حكومة تخبط
مجلس باي باي
والبوق أشكره من مخباي
إسكت وإقعد
شوف وإنت تبتسم وتشرب شاي
:)
باش مهندس
الحرامي اهوا اللي يرزونه بالديرة
العرزالة
متى البسمة ترجع للكويت
سيدة نفسي
ليبتون والا المنيس؟
في أحسن من ليبتون
:)ما اعتقد
سيدة نفسي
اي المنيس
الحال ذكرني بمسلسل يوميات مدير عام
مديرية فيها بوق و رشاوي ونفاق وواسطات ومحسوبيات وتسيب بالعمل وبيروقراطيه والناس تشتكي من المعاشات
وكل شي شين
حتى يقصون بصل بالدوام
اخر شي يعينون مدير يديد إلي اهو ايمن زيدان وتتعدل الامور
مايعطونا اثنين مثل ايمن زيدان{اقصد شخصيته بالمسلسل طبعاً}
ونحط واحد رئيس حكومة والثاني رئيس مجلس الامة
يمكن تتعدل امورنا (:
مساكين جماعات الكوادر
اخذوا مقلب من النقابات :)
الحكومة والخدمة المدنية وغيرها من المؤسسات جميعها لا تصلح لان يطلق عليها مصطلح مؤسسات !.
الحكومة شقّت نفسها
وي اسم الله عليك من قولة آه! ما عليه يا نهاش يا خوي...لنا الله
إنت نفذت منها ورحت كلية التجارة, أنا وربعي عيل شنقول اللي قعدنا نعد ونمد بهالزيادة؟
حياك واقرا الموضوع اللي انا كاتبه توني..له صله باللي اتكلم عنه
وهذا بلا ابوك يا عقاب
والله كاسرين حاطري الاطباء
اهم فعلا من يستحق الكادر
واذا كان البعض ممن لا يستحق الكادر قد اساء استخدام حقه بالاضراب والمطالبه بالكادر فهذا لا يعني الغاء الكوادر
ياني احساس اليهال
اذا قلنا لهم اللي يتشيطن راح نعاقبه ونعاقب الكل
نفس العقليه للاسف
:(
يعقوبو
على ايدك
وينهم نبيهم
حمد
نسميها حضانة مثلا بدل مؤسسات
مطقوق
الحكومة من زمان مشقوقة وميتة
الزين
الله يرزقكم
واذا لكم حق بتاخذونه
العرزالة
أتشرف بقرايته
باش مهندس
اي والله هذي بلوتنا
استكانه
عقلية حكومية داثرة
Post a Comment