التكتل الشعبي

تحديث

نبارك لحكومتنا الدايخة انضمام اتحاد كرة القدم لقائمة متحدي القانون وفرضه عدد 5 أعضاء لمجلس ادارة الاتحاد ضاربا بقوانين الاصلاح الرياضي عرض الحائط

وعليه لا نستغرب تطاول الكل على هذي الحكومة منتهية الصلاحية

علما ان ياي بالطريج استجواب الطبطبائي للطويل اللي ما صار له شهرين بالوزارة لأنه مو مشتهي الوكيل

وهم شكله أكو استجواب بالطريج حق الصبيح

هيك حكومة زبالة بدها هيك نواب وشعب أزبل

_____________________

للتكتل الشعبي حضور بارز في الساحة السياسية شئنا أم أبينا

كذلك له حضور قوي داخل مجلس الأمة كما تحسب له الحكومة الدايخة ألف حساب

وفي الآونة الأخيرة عزز التكتل تواجده في المجتمع السياسي بتكوين الحركة الشعبية (حشد) اللي ذكروا ان أعضائها تجاوزوا ال 3000 شخص

للتكتل الكثير من المؤيدين كما ان له الكثير من المعارضين

المؤيدين يشوفون ان التكتل يمثل جميع شرائح المجتمع وهذا صحيح ففيه الحضري والبدوي والسنة والشيعة بل ان حتى البدو فيه ممثلين بثلاثة قبائل اهيا شمر والعوازم والمطران

كما يرون ان له العديد من المواقف المشرفة تجاه الوطن منها الوقوف مع الدوائر الخمس والأحزاب وعدم تنقيح الدستور

المعارضين يشوفون ان التكتل يلعب على جميع الحبال فاهوا له مواقف زينة بس أكو مواقف ثانية ماهي مشرفة فالتكتل ما يعارض الفرعيات وكذلك ماله أجندة واستراتيجية مكتوبة وواضحة وانه يسوي شغلة صح وعشرة غلط

ومع زحمة القوانين المقترحة للتلاعب بالفوائض المالية وعلى أساس مبدأ كل من طق طبله قال آنا قبله تعهد التكتل بتقديم قانون يعالج عملية اسقاط القروض...ويا عيني على اسقاط القروض اللي آنا من أشد معارضينها رغم اني مقترض وذلك لعدة أسباب

منها ان الأولى استخدام الفوائض للصرف على التنمية المستدامة من تعليم وصحة وبنية تحتية وبناء المدن الصناعية والسكنية اللي تخفف على المواطن الكثير من المصاريف وترفع من رفاهيته وتضمن مستقبل أطفاله

وكذلك لأن محد طقني على ايدي يوم رحت واقترضت فليش أحمل غيري مسؤولية أخطائي ان كان الاقتراض يعد خطأ من الأساس

والأهم ان بقاء الوطن ككيان أهم من بقائي كفرد فنحن نموت ويبقى وطننا باذن الله مدى الحياة

الحين وعقب كل هالمقدمة ايي السؤال اللي ما راح أوجهه حق

مسلم البراك راعي مبدأ أخذوهم بالصوت

ولا مرزوق الحبيني اللي كان عضو بالمجلس الوطني

ولا محمد الخليفة اللي ما نسمع صوته الا بقضايا البدون

ولا أحمد لاري اللي حاط صورة حسن نصرالله بديوانيته بدل علم الكويت

ولا عبدالصمد اللي تحالف مع اخونجي بالانتخابات ونسى كل مبادئه بس عشان الفوز

ولا حسن جوهر اللي سكت عن قانون منع الاختلاط بالجامعة واهوا الأستاذ الجامعي

آنا بوجهه حق بوعبدالعزيز النائب أحمد السعدون اللي ياما تغنى بالدستور

واللي تربينا على ايده أيام دواوين الاثنين واللي كان لنا دوم رمز

بذمتك يا بوعبدالعزيز أي قانون بالعالم راح يضمن العدالة باسقاط القروض

شنو ذنب اللي ماقترض؟

ووين العدالة بين اللي اقترض لضرورة واللي اقترض لكماليات؟

وين العدالة باللي اقترض عشان يوسع بيته حق عياله واللي اقترض عشان يوسع تجارته؟

يا بوعبدالعزيز انت أكبر من جذي

يا بوعبدالعزيز لايقص عليك البراك وربعه ويوهقونك بقوانين مو دستورية

يا بوعبدالعزيز لا تخيب ظننا فيك